اسلام آباد۔26اپریل (اے پی پی):وفاقی وزیر اطلاعات و نشریات چوہدری فواد حسین سے پاکستان میں سعودی عرب کے سفیرنواف بن سعید المالکی نے ملاقات کی اور سعودی وزیر برائے میڈیا امورڈاکٹر مجید بن عبداللہ الکسابی کی جانب سے دورہ سعودی عرب کا دعوت نامہ دیا ۔اپنے دعوت نامے میں سعودی وزیربرائے میڈیا نے وزیر اطلاعات چوہدری فواد حسین کے لئے ماہ رمضان میں سعودی عرب کے دورہ‘ عمرہ ادائیگی‘ مدینہ منورہ میں مسجد نبوی ﷺ کی زیارت کی خواہش کا اظہار کرتے ہوئے کہا کہ یہ دورہ دونوں ممالک کے مابین میڈیا تعاون کو مستحکم کرنے کے طریقوں اور ذرائع پر تبادلہ خیال کا بھی موقع فراہم ہوگا۔ وفاقی وزیر اطلاعات و نشریات چوہدری فواد حسین نے سعودی ہم منصب کی دورہ کی دعوت قبول کرتے ہوئے کہا کہ جلد ہی سعودی عرب کا دورہ کروں گا۔ انہوں نے کہا کہ پاکستان اور سعودی عرب کے مابین گہرے برادانہ تعلقات‘ مشترکہ عقیدے ‘ثقافت ‘ اقدار و روایات پر مبنی ہے ‘میڈیا تعاون کو مزید وسعت دینے کی ضرورت ہے۔ملاقات کے دوران ممالک کے درمیان ثقافتی تعاون کو فروغ دینے کے حوالے سے مفاہمتی یاداشتوں پ عمل درآمد پر زور دیا گیا ۔وفاقی وزیر چوہدری فواد حسین نے کہا کہ ثقافت کے میدان میں تعاون ایک دوسرے کے اقدار کو سمجھنے اور دونوں ممالک کے عوام کو مزید قریب لانے کے لئے ضروری ہے۔دونوں فریقین نے کوویڈ 19 کی حالیہ صورتحال اور اس ضمن میں ایک دوسرے کے تجربات سے استفادہ حاصل کرنے کے حوالے سے تبادلہ خیال کیا ۔وزیر اطلاعات چوہدری فواد حسین نے سعودی سفیر کو کورونا وباءپر قابو پانے کے لئے پاکستان کی سمارٹ لاک ڈائون حکمت عملی سے آگاہ کیا جسے بین الاقوامی سطح پر پذیرائی حاصل ہوئی ‘وزیراعظم عمران خان کا عوام کی زندگیوں اور غریب طبقات کے روزگار کا تحفظ کا ویزن کورونا سے نبردآزما ہونے میں کارگرثابت ہوا ۔انہوں نے کہا کہ حکومت عوام کو کورونا وائرس سے بچانے کے لئے مزید اقدامات اٹھانے کے لے پرعزم ہے۔
