اسلام آباد ، 30 اپریل (اے پی پی ): وزیر خارجہ مخدوم شاہ محمود قریشی نے کہا ہے کہ پاکستان، ہنگری کے ساتھ دو طرفہ تعلقات کو خصوصی اہمیت دیتا ہے، پاکستان اور ہنگری کے مابین بزنس ونڈو کے آغاز سے دو طرفہ تجارت کے حجم میں اضافے کے وسیع امکانات موجود ہیں۔
ان خیالات کا اظہار وزیر خارجہ شاہ محمود قریشی نے جمعہ کو یہاں وزارتِ خارجہ میں ہنگری کے وزیر خارجہ و تجارت پیٹر سجارتو سے ملاقات میں کیا ۔ وزیر خارجہ نے ہنگری کے وزیر خارجہ و تجارت پیٹر سجارتو کو وزارت خارجہ آمد پر خوش آمدید کہتے ہوئے کہا کہ کرونا وبا کے دوران میری دعوت پر آپ کی ممتاز کاروباری شخصیات پر مشتمل وفد کے ہمراہ آمد انتہائی مسرت کا باعث ہے، ہنگری یورپ کے اہم ممالک میں شامل ہے۔
انہوں نے کہا کہ ہماری حکومت جغرافیائی اقتصادی ترجیحات پر توجہ مرکوز کیے ہوئے ہے ، پاکستان، 220 ملین آبادی پر مشتمل ایک ابھرتی ہوئی مارکیٹ ہے جہاں سرمایہ کاری کے وسیع مواقع موجود ہیں ، ہماری حکومت سرمایہ کاروں کو ٹیکس میں چھوٹ سمیت بہت سی پرکشش مراعات دے رہی ہے۔
وزیر خارجہ نے کہا کہ ہم نے بیرونی سرمایہ کاروں کی سہولت کیلئے “ای ویزا” کا آغاز کیا ہے جس کے حوصلہ افزا نتائج سامنے آ رہے ہیں ، پاک چین اقتصادی راہداری کے تحت زیر تکمیل 9 خصوصی اقتصادی زونز میں سرمایہ کاری کے وسیع مواقع موجود ہیں۔
وزیر خارجہ نے ہنگری کے وزیر خارجہ پیٹر سجارتو کو مقبوضہ جموں و کشمیر میں جاری انسانی حقوق کی سنگین خلاف ورزیوں اور علاقائی امن کو درپیش خطرات سے آگاہ کیا اور کہا کہ پاکستان ،افغان امن عمل سمیت ،خطے میں امن و استحکام کیلئے اپنی مصالحانہ کوششیں بروئے کار لا رہا ہے ۔
ہنگری کے وزیر خارجہ نے افغان امن عمل سمیت خطے میں قیام امن کیلئے پاکستان کی مصالحانہ کوششوں کو سراہا۔ انہوں نے پر تپاک خیر مقدم پر وزیر خارجہ کا شکریہ ادا کرتے ہوئے دو طرفہ تجارتی، اقتصادی و سیاسی تعلقات کو مزید مستحکم بنانے کیلئے مشترکہ کاوشیں بروئے کار لانے
دوران ملاقات دو طرفہ تعلقات ،مختلف شعبہ جات بالخصوص تجارتی و اقتصادی تعاون کے فروغ سمیت باہمی دلچسپی کے امور پر تبادلہ خیال کیا گیا۔ دونوں وزرائے خارجہ کے مابین زراعت، خوراک، ماحولیات، آبی وسائل، انجینئرنگ، ووکیشنل ٹریننگ اور اربن پلاننگ سمیت مختلف باہمی دلچسپی کے شعبہ جات میں دو طرفہ تعاون کے فروغ پر اتفاق کیا۔
اے پی پی /ملتان/قرۃالعین
