سکھر،18مئی(اے پی پی ): انسداد دہشتگردی کی عدالت میں صحافی اجے لالوانی کے قتل کیس کی سماعت ہوئی، عدالت نے پولیس کی جانب سے چالان پیش نہ کرنے پر برہمی کا اظہار کیا اور 31 مئی تک چالان پیش کرنے کی مہلت دی جبکہ ملزمان کو جوڈیشل ریمانڈ پر جیل بھیج دیا گیا۔
سکھر ضلع کی تحصیل صالح پٹ میں قتل ہونے والے صحافی اجے لالوانی کے قتل کیس کی سماعت سکھرکی انسداد دہشتگردی کی عدالت میں ہوئی۔سماعت کے موقع پر پولیس نے قتل کیس میں نامزد رضا شاہ ،جمیل شاہ ،اکبر منگریو سمیت پانچ ملزمان کو عدالت میں پیش کیا تاہم کیس کا چالان پیش نہ کیا جس پر عدالت کے جج آنند رام نے تفتیشی افسر پر برہمی کا اظہار کرتے ہوئے ریمارکس دیئے کہ آپ لوگ نااہل ہو اس لیے چالان پیش نہیں کررہے ہو جس پر وہاں پر موجود سرکاری وکیل اور تفتیشی افسر نے عدالت کو بتایا کہ واقعہ کی تحقیقات کے لیے حکومت کی جانب سےجے آئی ٹی بنائی گئی ہے جو تفتیش کررہی ہے اس لیے چالان پیش نہیں کیا جاسکاہے، اس لیے چالان پیش کرنے کے لیے مہلت دی جائے جس پر عدالت نے ان کی مہلت کی استدعا منظور کرتے ہوئے کیس کی سماعت 31 مئی تک ملتوی کردی اور ملزمان کو جوڈیشل ریمانڈ پر جیل بھیج دیا۔
