انقرہ،18مئی(اے پی پی):پاکستان اور ترکی نے فلسطین میں جاری اسرائیلی جارحیت کیخلاف اقوام متحدہ میں مل کر آواز اُٹھانے کا فیصلہ کیا۔
یہ فیصلہ وزیر خارجہ مخدوم شاہ محمود قریشی اور ترک وزیر خارجہ میولوت چاوش اولو کے درمیان منگل کو یہاں ملاقات کے دوران کیا گیا۔ملاقات میں دونوں وزرائے خارجہ کے مابین فلسطین میں امن و امان کی صورتحال پر تبادلہ خیال کیا گیااور نہتے فلسطینیوں پر اسرائیلی جارحیت اور فلسطینیوں کی جبراً بے دخلی کی پر زور مذمت کی۔
ترک وزیر خارجہ میولوت چاوش اولو نے او آئی سی کی ایگزیکٹو کمیٹی کے وزرائے خارجہ اجلاس میں وزیر خارجہ مخدوم شاہ محمود قریشی کے خطاب اور پاکستان کی جانب سے مظلوم فلسطینیوں کی مسلسل اور بھرپور حمایت کو سراہا۔
وزیر خارجہ شاہ محمود قریشی نے فلسطین کے معاملے پر ترک صدر رجب طیب اردوان اور ترک حکومت کے ٹھوس اور واضح موقف کی تعریف کرتے ہوئے کہا ہے کہ غزہ میں اسرائیلی حملوں اور رمضان المبارک وعیدالفطر کے دوران فلسطین میں پرتشدد واقعات کے تسلسل سے پوری امت مسلمہ دل گرفتہ ہے ۔
۔مخدوم شاہ محمود قریشی نے کہا کہ ہم فلسطینی بھائیوں کو تنہا نہیں چھوڑیں گے، وزیر اعظم عمران خان کی ہدایت پر ہم پاکستان میں 21 مئی کو فلسطینی بھائیوں کے ساتھ اظہار یکجہتی کیلئے “یوم یکجہتی فلسطین” کے طور پر منا رہے ہیں۔
قبل ازیں ترک وزارت خارجہ آمد پر ترک وزیر خارجہ میولوت چاوش اولو نے وزیر خارجہ مخدوم شاہ محمود قریشی کا خیر مقدم کیا۔
ترک وزیر خارجہ میولوت چاوش اولو نے وزیر خارجہ مخدوم شاہ محمود قریشی اور ان کے وفد کے اعزاز میں ظہرانہ بھی دیا۔
