اسلام آباد، 18مئی (اے پی پی):سپیکر قومی اسمبلی اسد قیصر نے منگل کو اپنے ایرانی ہم منصب محمد باقر قالیباف کو ٹیلی فون کیا جس میں فلسطین کی موجود صورتحال پر تفصیلی تبادلہ خیال کیا گیا۔ دونوں رہنماؤں نے اسرائیلی جارحیت کے خلاف فلسطین کے لئے مل کر آواز اٹھانے پر اتفاق کیا۔سپیکر قومی اسمبلی نے غزہ میں اسرائیلی حملوں کی شدید الفاظ میں مذمت کی اور کہا کہ عید الفطر اور رمضان المبارک میں فلسطینی شہریوں پر جارحیت انتہائی افسوسناک اور قابل مذمت ہے۔اسرائیلی ظلم اور بربریت کے خلاف او آئی سی ممالک کو خطوط لکھے ہیں۔پاکستان کی قومی اسمبلی نے 17 مئی کو اسرائیل کی فلسطین پر جارحیت کے خلاف متفقہ طور پر مذمتی قرارداد منظور کی ہے۔عالمی اداروں اور انسانی حقوق کی تنظیموں کی خاموشی قابل مذمت ہے ۔
اسد قیصرنے کہا کہ اسرائیل کی جانب سے معصوم فلسطینیوں پر حملے انسانی اصولوں کے منافی ہیں، ایران کا مسلم ممالک میں کردار کلیدی اہمیت کا حامل سمجھا جاتا ہے۔تمام اسلامی ملکوں کو مسلم امہ کے مسائل کے حل کے لئے رہنما اصول اور تجاویز مرتب کرنا ہوں گی۔ سپیکر قومی اسمبلی اسد قیصر نے اپنے ہم منصب کو اقتصادی تعاون تنطیم کی پارلیمانی اسمبلی کے اجلاس میں شرکت کی دعوت بھی دی۔
ایرانی سپیکر نے فلسطین کے معاملے پر مسلم ممالک میں اتفاق رائے کی ضرورت پر زور دیا اور کہا کہ ایران فلسطین سمیت مسلم امہ کو درپیش مسائل کے حل کے لئے اپنا بھرپور کردار ادا کرتا رہے گا۔
