اسلام آباد،3جون (اے پی پی):صدر مملکت ڈاکٹر عارف علوی نے سمندر پار پاکستانیوں کو ووٹ کا حق دینے کے لئے آئی ووٹنگ سسٹم پر کام تیز کرنے کی ضرورت پر زور دیتے ہوئے کہا ہے کہ موثر انتخابی طریقہ کار نہ ہونے کے باعث سمندر پار پاکستانی انتخابی عمل میں حصہ نہیں لے سکتے، اس مقصد کے لئے کیلئے آئی ووٹنگ کا موثر اور فول پروف نظام وضع کرنے کیا جائے۔
وہ جمعرات کو یہاں ایوان صدر میں آئی ووٹنگ میں ابھرتی ٹیکنالوجیز پر ذیلی کمیٹی کے اجلاس کی صدارت کر رہے تھے۔ صدر مملکت نے کہا کہ بیرون ملک مقیم پاکستانی کمیونٹی ترسیلات زر کے ذریعے ملکی ترقی میں اہم کردار ادا کر رہی ہے۔ موثر انتخابی طریقہ کار نہ ہونے کے باعث سمندر پار پاکستانی انتخابی عمل میں حصہ نہیں لے سکتے ۔ انہوں نے کہا کہ سمندر پار پاکستانیوں کو ووٹ کا حق دینے کے لئے آئی ووٹنگ سسٹم پر کام تیز کرنے کی ضرورت ہے، اس سلسلے میں ماہرین کی مدد لی جائے اور آئی ووٹنگ متعارف کرانے کے لئے مدت متعین کی جائے۔
وزارت آئی ٹی اور نادرا کی جانب سے اجلاس کو آئی ووٹنگ کے حوالے سے مجوزہ حل کے بارے میں بریفنگ دی گئی۔ صدر مملکت نے انتخابی اصلاحات شروع کرنے میں گہری دلچسپی لینے پر الیکشن کمیشن کے کردار کی تعریف کی۔ انہوں نے انٹرنیٹ ووٹنگ سے متعلق وزارت آئی ٹی اور نادرا کی جانب سے تکنیکی تعاون کو بھی سراہا۔
اجلاس میں وزیر برائے آئی ٹی، سید امین الحق اور سیکرٹری آئی ٹی محمد سہیل راجپوت، چیئرمین نادرا خالد لطیف اور ڈائریکٹر جنرل آئی ٹی الیکشن کمیشن خضر عزیز، دیگر متعلقہ سینئر حکام اور ایڈوائزری کمیٹی کے ممبران نے بھی شرکت کی۔
