لاہور ،14 جون (اے پی پی): وزیر اعلیٰ عثمان بزدار نے کہا کہ پنجاب کی تاریخ میں پہلی بار ترقیاتی بجٹ میں ریکارڈ اضافہ کیا جارہا ہے، پہلی بار ہر ضلع کا علیحدہ ڈویلپمنٹ پیکیج تیار کیا گیا ہے، بجٹ میں عام آدمی کو ریلیف دینے کے لئے اقدامات تجویز کئے گئے ہیں، بجٹ میں حقیقت پسندانہ اہداف مقرر کئے گئے ہیں، صوبے کے عوام کی بنیادی ضروریات کو مدنظر رکھ کر ترجیحات کا تعین کیا گیا ہے۔
ان خیالات کا اظہار وزیراعلیٰ پنجاب سردار عثمان بزدار نے صوبائی کابینہ کے اجلاس کی صدارت کرتے ہوئے کیا۔اجلاس میں پنجاب کابینہ نے نئے مالی سال 2021-22کے بجٹ کی تجاویز اور مالیاتی بل 2021 کی منظوری دے دی، اس کے علاوہ پنجاب کابینہ نے صوبائی ملازمین کی تنحواہوں اور پنشن میں 10 فیصد اضافے کی منظوری اور ورکرز کی کم از کم اجرت 17500سے بڑھا کر 20ہزار روپے کرنے کا احسن فیصلہ کیا گیا۔
اجلاس میں کابینہ سٹینڈنگ کمیٹی برائے فنانس اینڈ ڈویلپمنٹ کے57 ویں اور58 ویں اور سٹینڈنگ کمیٹی برائے قانونی امور کے60 ویں،61 ویں اور62 ویں اجلاسوں کے فیصلوں کی توثیق کی گئی۔
کابینہ اجلاس میں بورڈ آف ریونیو کی جانب سے زرعی ٹیکس میں اضافے کی تجویز پیش کی گئی جس پر وزیراعلی عثمان بزدار نے زرعی ٹیکس میں اضافے کی تجویز کو رد کرتے ہوئے کہا کہ کسان پر کوئی بوجھ نہیں ڈالا جائے گا، آج پی ٹی آئی کے دور میں کاشت کار خوشحال ہے، کاشتکار کو مزید خوشحال بنائیں گے اور ریلیف دیں گے۔
انہوں نے کہا کہ یہ بجٹ اعدادوشمار کی جادوگری نہیں بلکہ متوازن ترقی پر مبنی حقیقی دستاویزہے، نااہل اورناکام اپوزیشن کا کام صرف شور مچانا رہ گیا ہے، انہیں حکومت کے اچھے کاموں پر تنقید برائے تنقید کرنا زیب نہیں دیتا، اپوزیشن نے کورونا وباء کے دوران بھی صرف واویلا کیااورعوام کو تنہا چھوڑے رکھا، بجٹ اجلاس کے دوران اراکین اسمبلی سے مسلسل رابطہ رہے گا۔
