اسلام آباد،16جون (اے پی پی):وفاقی وزیر سائنس و ٹیکنالوجی سینیٹر شبلی فراز نے کہا ہے کہ الجبرا،ریاضی اور دیگر سائنسی مضامین کی بنیاد مسلم سائنسدانوں نے رکھی،ہم سائنس کے میدان میں کھویا مقام حاصل کرنے کیلئے کوشاں ہیں،موجودہ حکومت نوجوان سائنسدانوں کو ہر ممکن سہولت فراہم کر رہی ہے،ہم نے سائنس وٹیکنالوجی کا بجٹ دگنا کر دیا ہے،اپوزیشن پارلیمنٹ اور ملکی سطح پر منفی کردار ادا کر رہی ہے۔
بدھ کو یہاں پاکستان سائنس فاؤنڈیشن میں تقریب سے خطاب میں وفاقی وزیر نے کہا کہ موجودہ ملکی اقتصادی ترقی کیلئے سائنس و ٹیکنالوجی پر زیادہ توجہ دے رہی ہے،ہم نے موجودگی بجٹ میں سائنس و ٹیکنالوجی کے فنڈز میں دگنا اضافہ کر دیا ہے۔پاکستان سائنس فاؤنڈیشن کے پروگرام سے ٹیلنٹ ابھر کر سامنے آیا ہے۔انہوں نے کہا کہ پاکستان سائنس فاؤنڈیشن نوجوان سائنسدانوں کو تحقیق کیلئے ملک بھر میں موجود لیبارٹریوں تک یکساں رسائی کیلئے منصوبہ بندی کر رہی ہے۔
وفاقی وزیر نے بین الاقوامی سطح پر اپنے صلاحیتوں کا لوہا منوانے والے نوجوان پاکستانی سائنسدانوں کی کاوشوں کو سراہتے ہوئے کہا کہ ان بچوں نے محرومیوں کو مواقع میں بدل کر دکھایا،اہم چیز سوال کرنا ہے، سوال کرنے سے انسان آگے بڑھتا ہے۔ریاضی، الجبرا کی بنیاد ہم نے رکھی پھر ہم پیچھے رہ گئے۔انہوں نے نوجوان نسل پر زور دیا کہ وہ تحقیق پر زیادہ توجہ مرکوز کریں اور چیزوں کی تہہ تک جائیں۔انہوں نے کہا کہ ہم اپلائیڈ ریسرچ کی طرف زیادہ جائیں گے،اس ریسرچ پیپر کا کوئی فائدہ نہیں جس کا کوئی عملی فائدہ نہ ہو۔
بعد ازاں میڈیا سے گفتگو کرتے ہوئے وفاقی وزیر نے کہا کہ گزشتہ روز پارلیمنٹ میں جو کچھ ہوا افسوسناک ہوا،ماضی میں مسلم لیگ (ن) اور پیپلز پارٹی نے پارلیمنٹ دھنگا مشتی اور کام نہ کرنے دینا اور پارلیمنٹ کی کارروائی میں مخل ہونے کی جو مثالیں قائم کی ہیں،اس میں اس کا بڑا عمل دخل ہے،ہم نے یہ بھی دیکھنا ہے کہ کیا اپوزیشن ملک کیلئے کام کر رہی ہے،کیا وہ ملکی مسائل پر بات کرنا یا قانون سازی چاہتی ہے؟جو ہمیں پچھلے اٹھائیس سال میں نظر نہیں آئی۔
شبلی فراز نے کہا کہ اپوزیشن منفی کردار ادا کر رہی ہے جو ملک اور عوام کیلئے بھی ٹھیک نہیں ہے،اپوزیشن کو زیادہ سنجیدگی کا مظاہرہ کرنے کی ضرورت ہے۔انہوں نے کہا کہ ہم پی سی سی ایکٹ کا بھی جائزہ لے رہے ہیں کہ اس تبدیلیوں کی کتنی گنجائش ہے۔انہوں نے مزید کہا کہ ہم پی سی سی کو ایک مثالی ادارہ بنائیں گے۔
