لاہور، 17جون (اے پی پی): گورنر پنجاب چوہدری محمدسرور سے مشیر قومی سلامتی ڈاکٹر معید یوسف نے جمعرات کو یہاں ملاقات کی ہے، ملاقات میں چوہدری محمدسرور کے دورہ امریکہ ، مسئلہ کشمیر و فلسطین سمیت دیگر اہم معاملات پر بات چیت کی گئی۔ چوہدری سرور اور معیدیوسف نے امن کیلئے مسئلہ کشمیر اور فلسطین کا حل لازم قرار دیا۔
اس موقع پر گورنر پنجاب چوہدری محمدسرور نے کہا کہ دہشتگردی کے خاتمے اور امن کیلئے پاکستان کی قربانیں دنیا میں مثال ہیں،الحمد للہ آج پاکستان سفارتی محاذ پر کامیابی سے آگے بڑھ رہا ہے۔انہوں نے کہا کہ وزیر اعظم عمران خان کشمیر اور فلسطینیوں کے سفیر بن کر انکا مقدمہ لڑ رہے ہیں، اسرائیل کا ایک بار پھر بے گناہ فلسطینیوں پر حملے کر نا بدتر ین دہشت گردی ہے۔
مشیر قومی سلامتی معید یوسف کا کہنا تھا کہ پاکستان کشمیر ی اور فلسطینی بہن بھائیوں کیساتھ متحد کھڑا ہے، پاکستان افغانستان کا بڑا بھائی ہے ہم وہاں مکمل امن چاہتے ہیں، افغانستان امن مذاکرات کیلئے بھی پاکستان نے بہت محنت کی ہے۔
