اسلام آباد17جون(اے پی پی): وزیر اعظم عمران خان نے پانی کی کمی اور بڑے شہروں میں ویسٹ واٹر ٹریٹمنٹ پلانٹس کی اہمیت پر زور دیتے ہوئے کہا کہ پانی کی کمی کو پورا کرنے اور واٹر ٹریٹمنٹ پلانٹس کے لئے جدید ٹیکنالوجی کا استعمال ناگزیر ہے۔ ان خیالات کا اظہار انہوں نے جمعرات کو راوی اربن سٹی اور سنٹرل بزنس ڈسٹرکٹ منصوبے پر پیش رفت کے حوالے سے اجلاس کی صدارت کرتے ہوئے کیا۔
اجلاس میں وزیر خزانہ شوکت ترین، معاون خصوصی ڈاکٹر شہباز گل، چیئرمین نیا پاکستان ہاؤسنگ اتھارٹی لیفٹیننٹ جنرل (ر) انور علی حیدر، سی ای او راوی اربن ڈویلپمنٹ اتھارٹی عمران امین، وائس چیئرمین ایل ڈی اے ایس ایم عمران اور سینئیر افسران شریک تھے۔
اجلاس میں ان دونوں کلیدی منصوبوں میں ہونے والی پیشرفت پر تفصیلی بریفنگ دی گئی۔ بریفنگ میں بتایا گیا کہ سیفائر- بے میں ترقیاتی کام اگلے ہفتے کنٹریکٹ کے اجراء کے بعد جلد شروع کر دیا جائے گا۔ انڈسٹریل زون کے حوالے سے منظوری کا عمل بھی جون میں مکمل ہو جائے گا جس کے بعد انفراسٹرکچر کی تعمیر کا کام شروع کر دیا جائے گا۔
راوی سٹی میں اقراء یونیورسٹی، یو ایم ٹی اورآئی ایس سی اپنے کیمپسز قائم کریں گے۔ اقراء یونیورسٹی نے اپنے کیمپس کے ساتھ ساتھ ہسپتال کی تعمیر میں بھی دلچسپی ظاہر کی ہے۔
اجلاس کو راوی سٹی میں واسا کے تین واٹر ٹریٹمینٹ پلانٹس کی منتقلی اور ویسٹ واٹر ٹریٹمینٹ کے لئے جدید ٹیکنالوجی کے استعمال پر بھی بریفنگ دی گئی۔
شرکاء کو جوڈیشل واٹر کمیشن کی جانب سے اینوائر نمینٹل پروٹیکشن ایجنسی کو راوی سٹی منصوبے کے لئے منظوری کے عمل کو جلد مکمل کرنے کی ہدایات کے بارے میں بھی آگاہ کیا گیااور بتایا گیا منصوبے میں مقامی آبادی کے لئے ملازمتوں کا کوٹہ مختص کیا گیا ہے، ابتدائی طور پر ایک لاکھ مقامی خاندانوں کو اس منصوبے سے روزگار کے مواقع میسر آئیں گے۔ اس کے علاوہ علاج معالجے کے حوالے سے مقامی افراد کو علاج کے اخراجات میں 50 فیصد رعایت میسر ہوگی۔
وزیر اعظم نے پانی کی کمی اور خصوصاً لاہور جیسے بڑے شہروں میں ویسٹ واٹر ٹریٹمینٹ پلانٹ کی اہمیت پر زور دیتے ہوئے کہا کہ پانی کی کمی کو پورا کرنے اور واٹر ٹریٹمینٹ پلانٹس کے لئے جدید ٹیکنالوجی کا استعمال ناگزیر ہے۔
وزیر اعظم نے واٹر ٹریٹمینٹ اور ویسٹ واٹر ڈسپوزل کےضمن میں ایک مربوط اور جامع حکمت عملی مرتب کرنے کی ہدایت دی تاکہ شہری آبادی کو صاف اور وافر پانی کی فراہمی کے ساتھ ساتھ زرعی مقاصد کے لئے بھی اضافی پانی کی فراہمی یقینی بنائی جا سکے۔
اجلاس کو سینٹرل بزنس ڈسٹرکٹ منصوبے پر پیشرفت کے حوالے سے بریفنگ دیتے ہوئے بتایا گیا کہ اس منصوبے میں نیلامی کا عمل جولائی 2021 کے پہلے ہفتے میں شروع کر دیا جائے گا۔ سینٹرل بزنس ڈسٹرکٹ منصوبے کے حوالے سے بورڈ قائم ہو چکا ہے، نیسپاک اور ایف ڈبلیو او سے ڈیزائن کے حوالے سے معاونت جاری ہے اور ترقیاتی کام کا آغاز اگلے ہفتے سے کیا جا رہا ہے۔
