انطالیہ(ترکی)،18جون(اے پی پی):وزیر خارجہ مخدوم شاہ محمود قریشی نے کہا ہے کہ پاکستان 1967 سے قبل کی سرحدی صورت حال اور اقوام متحدہ کی قراردادوں کی روشنی میں مسئلہ فلسطین کے دو ریاستی حل کا حامی ہے اور فلسطینی عوام کے حق خود ارادیت کی جدوجہد کی حمایت کرتا ہے۔
ان خیالات کا اظہار وزیر خارجہ نے جمعہ کو یہاں انطالیہ ڈپلومیسی فورم کے موقع پر فلسطینی وزیر خارجہ ڈاکٹر ریاض المالکی کے ساتھ ملاقات کے دوران کیا ، ملاقات دو طرفہ تعلقات ، خطے کی صورتحال سمیت باہمی دلچسپی کے امور پر تبادلہ خیال کیا گیا، فلسطین کے وزیر خارجہ ڈاکٹر ریاض المالکی نے فلسطین میں امن و امان کی صورتحال کے حوالے سے آگاہ کیا۔
اس موقع پر وزیر خارجہ نے فلسطینی ہم منصب کو، مسئلہ فلسطین کے پر امن حل کیلئے پاکستان کی جانب سے کی گئی سفارتی کاوشوں سے آگاہ کیا اور فلسطین کے مسئلے پر او آئی سی اور عرب لیگ کی کاوشوں کو سراہا۔ انہوں نے وزیر اعظم عمران خان، پاکستانی قیادت اور عوام کی جانب سے فلسطینی قیادت کے ساتھ یکجہتی کا اظہار کیا۔
فلسطینی وزیر خارجہ نے مسئلہ فلسطین کے حوالے سے پاکستان کے واضح، دو ٹوک اور اصولی موقف کو سراہتے ہوئے علاقائی اور عالمی سطح پر پاکستان کی سفارتی معاونت پر پاکستان کی قیادت اور وزیر خارجہ مخدوم شاہ محمود قریشی کا شکریہ ادا کیا۔
وزیر خارجہ نے فلسطینی وزیر خارجہ کو دورہ ء پاکستان کی دعوت دی جسے انہوں نے شکریے کے ساتھ قبول کیا۔وزیر خارجہ نے شرٹ کا تحفہ بھی فلسطینی وزیر خارجہ کو پیش کیا جس پر تحریر تھا “اے ارض _ فلسطین میں بھی حاضر ہوں”۔
