کوئٹہ،20جون(اے پی پی): وزیراعلی بلوچستان جام کمال خان سے حکومتی و اتحادی جماعتوں کے اراکین نے وزیر اعلی سیکرٹریٹ میں ملاقات کی، ملاقات میں گزشتہ روز بجٹ سیشن کے موقع پر اپوزیشن کی جانب سے ہنگامی آرائی سمیت دیگر اہم سیاسی امور پر تبادلہ خیال کیا گیا۔
اس موقع پر اتحادی جماعتوں کے ارکان نے اسمبلی میں رونما ہونے والے واقعے پر شدید تحفظات کا اظہار کیا۔انہوں نے کہا کہ اپوزیشن کے اس رویے سے پورے ایوان کا استحقاق مجروح ہوا ہے۔ حکومتی و اتحادی جماعتوں نے اسپیکر بلوچستان اسمبلی کی جانب سے بلاے گئے پارلیمانی لیڈرز کے اجلاس میں احتجاجاً شرکت نہ کرنے کا فیصلہ بھی کیا، اگر اسپیکر اپنا کردار بہتر اور ذمہ دارانہ انداز میں ادا کرتے تو یہ نوبت نہیں آتی اور اسپیکر اسمبلی کے غیر ذمہ دارانہ رویہ اور طرز عمل کی وجہ سے یہ صورتحال پیدا ہوئی۔ اپوزیشن کے اس عمل سے نہ صرف بجٹ سیشن متاثر ہوا بلکہ اسمبلی کا تقدس بھی پامال ہوا۔
اس موقع پر وزیراعلی بلوچستان جام کمال خان نے کہا کہ پارلیمنٹ کی بالادستی ہم سب کی مشترکہ ذمےداری ہے،بلوچستان کی تاریخ میں ایسا واقع کبھی رونما نہیں ہوا اور اس واقعے کی ہم سب شدید الفاظ میں مذمت کرتے ہیں۔ وزیراعلیٰ جام کمال خان نے کہا کہ جس ایوان پر ہم سب کو فخر ہے اس کے تقدس کو اپوزیشن نے پامال کیا۔
