پشاور، 22 جون(اے پی پی): گورنر خیبرپختونخواہ شاہ فرمان نے کہا ہے کہ خیبرپختونخوا قدرتی وسائل سے زرخیز صوبہ ہے جو یورپی یونین کیلئے زراعت، معدنیات اور سیاحت کے شعبے سرمایہ کاری اور شراکتی منصوبوں کے لئے انتہائی پرکشش ہے۔
ان خیالات کا اظہار گورنر خیبرپختونخواہ شاہ فرمان نے پاکستان میں تعینات یورپی یونین کی سفیر آنڈرولا کمینارا سے منگل کو یہاں گورنر ہاؤس پشاور میں ملاقات کے دوران کیا۔ اس موقع پر گورنر خیبرپختونخواہ شاہ فرمان نے کہا کہ پرامن افغانستان، پاکستان اور خطے کے بہترین مفاد میں ہے۔ عالمی برادری کو افغانستان میں بدامنی کے باعث شدید متاثرہ افغان عوام کی امداد وبحالی کیلئے جامع پالیسی تشکیل دینا چاہیئے۔ امداد و بحالی منصوبوں سے خطے میں پائیدار امن اور خوشحالی آسکتی ہے۔
ملاقات میں یورپی یونین اور پاکستان کے مابین دوطرفہ اور تجارتی تعلقات کو مزیدمستحکم بنانے پر تبادلہ خیال سمیت مختلف شعبوں میں شراکت داری بڑھانے بالخصوص کوآپریٹیو فارمنگ، سمال کوآپریشن اور زیتون، خشک میوہ جات اور زعفران کی پیداوار میں سرمایہ کاری وبرآمد ات پر بھی تبادلہ خیال کیا گیا۔
