سیالکوٹ،23جون (اے پی پی): معاون خصوصی وزیر اعلی پنجاب برائے اطلاعات ڈاکٹر فردوس عاشق اعوان نے ڈسٹرکٹ ایکسائز اینڈ ٹیکسیشن آفس(ڈی سی آفس کمپلیلس) سیالکوٹ کا دورہ کیا۔ اس موقع پر میڈیا سے خطاب کرتے ہوئے ان کا کہنا تھا کہ وزیر اعظم عمران خان کے تبدیلی کے خواب کا سفر دیکھنے ایکسائزاینڈ ٹیکسیشن آفس آئی ہوں۔ ماضی میں یہ محکمہ عوام دکھ کا باعث بنتا رہا اور اب محکمہ کو بدلا ہوا دیکھ کر خوشی ہورہی ہے۔ایکسائز اینڈ ٹیکسیشن آج پبلک سروسز ڈیلیوری میں اہم کردارادا کررہا ہے یہ تبدیلی گڈ گورننس کی عملی تعبیر ہے اور محکمہ کی کارکردگی میں بہتری آرہی ہے۔انہوں نے کہا کہ ٹیکس کلیکشن کی مدد میں عوام کی فلاح کیلئے منصوبے تکمیل پارہے ہیں۔پاکستان تحریک انصاف کی حکومت نے کرپشن کے ناسور کا خاتمہ کرکے عوام کو ریلیف دیا ہےاس کا سہرا ڈیجیٹل سوچ کو جاتا ہے, ڈی جی ایکسائز اینڈ ٹیکسیشن کی سربراہی میں ادارہ ترقی کی منازل طے کررہا ہے۔محکمہ ایکسائز اینڈ ٹیکسیشن عوام کو ڈیجیٹل ٹیکنالوجی کے ذریعے سہولت فراہم کررہا ہےانہوں نے کہا کہ ایکسائز اینڈ ٹیکسیشن میں اربن یونٹ کے تعاون سے آن لائن پورٹل کا قیام عمل میں لایا گیاہے اورفیلڈ سٹاف کے صوابدیدی اختیار ختم کردیا گیایونیورسل نمبر پلیٹ کے اجراء سے پورا صوبہ ایک پنجاب بن گیا ہے۔
انہوں نے کہا کہ سمارٹ کارڈ کا اجراء انقلابی منصوبہ ہے اس سے بھاری بھر کم بکس اور فائلز میں ہیرا پھیری کا خاتمہ یقینی بنا دیا ہے۔اوپن ٹرانسفر کا خاتمہ کرکے بائیو میٹرک نظام متعارف کروا دیا ہے۔نادرا کے ذریعے سہولت سنٹر کو محکمہ کے ساتھ منسلک کردیا گیا۔ کوئی کسی جگہ نادرا سنٹر جاکر اپنے ٹرانسفر کرسکتا ہے۔ ای پیمنٹ کے ذریعے اپنے ذمہ واجبات گھر بیٹھ کر ادا کیے جا سکتے ہیں۔انہوں نے کہا کہ لگژری گاڑیوں کی ٹیکس چوری کا خاتمہ کردیا ہے اور تمام اضلاع میں ٹیکس کی شرح برابر کردی گئی ہےجبکہ پر کشش نمبر پلیٹ لینے والےافرادنمبر زکی آن لائن بڈنگ کے ذریعے اپنی پسند کا نمبر حاصل کر سکتے ہیں۔انہوں نے کہا کہ سیالکوٹ میں 16سرکل کو بڑھا کر ڈی جی اور ای ٹی او کی کاوشوں سے وسیع کردیا ہے۔ نئی ہاؤسنگ سوسائٹیز کو بھی ٹیکس نیٹ میں لارہے ہیں اور اب تک ٹیکس میں 2ارب کا اضافہ ہوا ہے جبکہ بیوہ اور مطلقہ خواتین کو ٹیکس معاف کرکے ریلیف دیا ہے۔عوام کو ٹیکس کے متعلق مشکلات سے نجات دلانے کا عزم ہے۔ محکمہ ایکسائز اینڈ ٹیکسیشن سیالکوٹ نے 60کروڑ روپے کا ہدف مکمل کرلیا ہے۔ایجنٹ مافیا ابھی بھی متحرک ہیں آن لائن اور ڈیجیٹلائزیشن کے ذریعے کالی بھیڑوں کا خاتمہ ممکن بنایا جائے گا۔ایجنٹ مافیا کی سیاہ کاریوں کو ختم کا واحد حل آن لائن اور ڈیجیٹلائزیشن ہے،کالی بھیڑوں کے خاتمہ کیلئے ای ٹی او فوری اقدام کرے۔اس محکمہ نے عوام کو ریلیف دینے میں مرہم بننا ہے۔عوام کے زخموں کو بھرنا ہے۔
انہوں نے کہا کہ ہمارے اتحادیوں کے ساتھ تعلق کچے دھاگے سے نہیں بندھا ہوایہ اتحاد ایک ملاقات سے کمزور نہیں ہوسکتا ہے۔ایک دوسرے سے میل ملاپ سیاست کا حسن ہے آصف زرداری سندھ کی فکر کریں۔انہوں نے کہا کہ پنجاب میں عوام اور کسان دوست اور مزدور کیلئے بہترین بجٹ پیش کرچکے ہیں۔اگلے دوسال پی ٹی آئی عوام کو ریلیف دینا چاہتی ہے۔ملک کو عدم استحکام کرنے کا کوئی حربہ اور سازش کامیاب نہیں ہوگی۔
