اسلام آباد،24 جون(اے پی پی): وفاقی وزیر داخلہ شیخ رشید احمد نے جوہرٹاون دھماکہ پر اپنے ویڈیو بیان میں کہا کہ پنجاب پولیس نے جوہر ٹاون دھماکے کی تحقیقات میں زبردست کامیابی حاصل کی ہے، پنجاب پولیس ملزمان کی گرفتاری کے قریب ہے اور جلد ملزمان کو قانون کی گرفت میں لیکر عوام کو اچھی خبر سنائی گی۔
انہوں نے کہا کہ جو لوگ ملک میں انتشار پھیلانا اور پاکستان کو انڈرپریشر لانا چاہتے ہیں وہ ناکام ہوں گے، پاکستان کبھی کسی دباؤ میں نہیں آئے گا۔
انہوں نے کہا کہ افغانستا ن بارڈ ر پر ہم نے چھیاسی فیصد اورایران بارڈر پر چھیالیس فیصد فینسنگ ہوگئی ہے، وزیراعظم عمران خان کی حکومت میں سیاسی اورمعاشی استحکام آیا ہے، پاکستان کے دشمنوں کو یہ چیز ایک آنکھ نہیں بھاتی، دشمنوں نے دہشت گردی کے راستے اپنانا شروع کیا ہے وہ ناکام ہوں گے اور پاکستان کے عوام پاک فوج کے ساتھ ملکر اس ملک میں امن استحکام اورترقی کاسفر جاری رکھیں گے۔
