اسلام آباد،یکم جولائی (اے پی پی):صدر مملکت ڈاکٹر عارف علوی نے کہا ہے کہ پاکستان آذربائیجان کے ساتھ تعلقات کی بہت قدر کرتا ہے ، دونوں ممالک کو مزید قریب لانے کیلئے سیاحت اور عوامی روابط کے شعبوں میں تعاون بڑھانا ہوگا، تجارت، معیشت، ثقافت کے شعبوں میں تعلقات کو مزید وسعت دینے کی ضرورت ہے۔
ان خیالات کا اظہار انہوں نے جمعرات کو پاکستان میں آذربائیجان کے سبکدوش ہونے والے سفیر علی علیزادہ سے ملاقات کے دوران کیا۔ صدر مملکت ڈاکٹر عارف علوی نے کہا کہ پاکستان آذربائیجان کے ساتھ تعلقات کی بہت قدر کرتا ہے ، پاکستان اور آذربائیجان کے تعلقات مضبوط تاریخی ، ثقافتی اور مذہبی رشتوں پر مبنی ہیں۔ انہوں نے کہا کہ دونوں ممالک کو دوطرفہ تجارت اور معاشی تعاون بڑھانے کیلئے ٹھوس اقدامات ، تجارتی وفود کے تبادلوں کی ضرورت ہے، دونوں ممالک کے مابین تمام بین الاقوامی فورمز پر بہترین تعلقات ہیں ۔
صدر مملکت نے کہا کہ تجارت، معیشت، ثقافت کے شعبوں میں تعلقات کو مزید وسعت دینے کی ضرورت ہے، دونوں ممالک کو مزید قریب لانے کیلئے سیاحت اور عوامی روابط کے شعبوں میں تعاون بڑھانا ہوگا۔ صدر مملکت ڈاکٹر عارف علوی نے وزیر اعظم عمران خان کے قرضوں میں ریلیف اقدام کی حمایت پر آذربائیجان کا شکریہ ادا کیا۔ صدر مملکت نے حیدر علی فاؤنڈیشن کے پاکستان میں فلاحی کاموں کی بھی تعریف کی۔ صدر مملکت نے دونوں ممالک کے تعلقات کو مزید مضبوط بنانے پر سفیر کی کاوشوں کو سراہا ۔
