غذائی تحفظ حکومت کی اولین ترجیح ہے، زرعی پیداوار میں اضافہ کیلئے اس شعبہ میں جدت لا رہے ہیں؛ وزیرِ اعظم عمران خان 

اسلام آباد،8جولائی  (اے پی پی):وزیرِ اعظم عمران خان  نے کہا ہے کہ غذائی تحفظ حکومت کی اولین ترجیح ہے، زرعی پیداوار میں اضافہ کیلئے اس شعبہ میں جدت لا رہے ہیں، جامع حکمتِ عملی کے تحت غذائی ضروریات کو پورا   کرنے کیلئے پیداوار میں اضافہ کریں گے، دودھ اور گوشت کی پیداوار بڑھنے سے قیمتوں میں کمی آئے گی۔

 انہوں نے ان خیالات کا اظہار جمعرات کو یہاں ایگری ڈیش بورڈ پر پیشرفت اور بیرونِ ملک دوروں کے دوران دستخط شدہ منصوبوں و معاہدوں کے مانیٹرنگ ڈیش بورڈ پر اجلاس کی صدارت کرتے ہوئے کیا۔ وزیرِاعظم کے غذائی تحفظ پر خصوصی توجہ کے وژن کے تحت ایگری ڈیش بورڈ سے زرعی اجناس کی طلب و کھپت کے اعشاریے حکومت کو کسی بھی طرح کے غذائی بحرانوں کی بروقت نشاندہی اور ان سے بچنے میں معاون ثابت ہوں گے۔ صوبائی حکومتوں کی معاونت سے ایگری ڈیش بورڈ اشیاءِ خوردنوش کی قیمتوں کو بڑھنے سے روکنے کو یقینی بنائے گا۔

 وزیرِ اعظم نے ایگری ڈیش بورڈ کے حتمی مراحل کو ترجیحی بنیادوں پر مقررہ مدت میں مکمل کرنے اور اسے جلد مکمل فعال بنانے کی ہدایات جاری کیں۔ اجلاس کو لائیوسٹاک کی جینیاتی تنوع میں بہتری کے حوالے سے اٹھائے گئے اقدامات سے بھی آگاہ کیا گیا۔

 ڈاکٹر معید یوسف نے وزیرِ اعظم کے بیرونِ ملک دوروں اور پاکستان میں بیرونِ ملک سے آئے سربراہان سے کئے گئے معاہدوں پر عملدرآمد کی نگرانی کیلئے بنائے گئے ڈیش بورڈ کے حوالے سے بریفنگ دی۔ ڈیش بورڈ نہ صرف وزیرِ اعظم کے دوروں کی تفصیلات کا ریکارڈ رکھے گا بلکہ معاہدوں پر عملدرآمد اور فیصلوں کی بھی نگرانی میں معاون ثابت ہوگا، ڈیش بورڈ وزراتوں کی راہ میں حائل رکاوٹوں کو دور کرکے معاہدوں پر عملدرآمد کی رفتار بڑھانے کو بھی یقینی بنائے گا۔

 اس موقع پر وزیرِ اعظم نے کہا کہ غذائی تحفظ حکومت کی اولین ترجیح ہے، زرعی پیداوار کو بڑھانے کیلئے اس شعبے میں جدت لارہے ہیں، ایگریکلچرل ٹرانفارمیشن پلان ایک جامع حکمتِ عملی کے تحت ملک کی غذائی ضروریات کو پورا   کرنے کیلئے پیداوار کو بڑھایا جائے گا، دودھ اور گوشت کی پیداوار بڑھنے سے قیمتوں میں کمی آئے گی۔

وزیرِ اعظم نے کہا کہ بیرونِ ملک دوروں کے دوران کئے گئے معاہدوں پر بر وقت عمل کیلئے رکاوٹوں کی نشاندہی کرکے ان کا تدارک کیا جائے گا تاکہ ایسے منصوبے جو ملکی مفاد کیلئے اہم ہیں ان کی تکمیل میں کسی قسم کی تاخیر نہ ہو۔

اجلاس میں وفاقی وزیر غذائی تحفظ سید فخر امام،  وزیراعظم کے معاونِ خصوصی جمشید اقبال چیمہ، وزیراعظم کے معاونِ خصوصی ڈاکٹر شہباز گل اور متعلقہ افسران نے شرکت کی۔