لاہور، 15 جولائی(اے پی پی): گونر پنجاب چوہدری سرور نے کہا ہے کہ حکومت غیرملکی سرمایہ کاروں کو سہولتیں دینے کے لیے سپیشل اکنامک زونز بنا رہی ہے ، بزنس کمیونٹی کا ملک کی ترقی میں اہم کردار ہے پاکستان سرمایہ کاری کے لیے محفوظ ملک ہے۔
ان خیالات کا اظہار گونر پنجاب نے جمعرات کو یہاں انڈونیشین سفیر آدم ملاورمان توگیو سے میں ملاقات کے دوران کیا ، ملاقات میں گورنر پنجاب اور انڈونیشین سفیر نے دوطرفہ تعلقات اور تجارتی تعلقات کو مزید فروغ دینے پر اتفاق اور امن کیلئے مسئلہ کشمیراور مسئلہ فلسطین کا حل لازمی قرار دیا۔
اس موقع پر گورنر پنجاب کا کہنا تھا کہ پاکستان اور انڈو یشیا کے مابین گہرے مذہبی، ثقافتی اور تجارتی تعلقات ہیں، انڈونیشیا پاکستان کا اہم تجارتی پارٹنر ہے ۔دونوں ممالک کے تعلقات پہلے سے زیادہ مضبوط ہیں، پاکستان انڈونیشیا سے پام آئل درآمد کرنے والے سرفہرست 5 ممالک میں شامل ہے جبکہ دونوں ممالک کے مابین تجارتی وفود کے تبادلے سے دو طرفہ تعلقات مذید مستحکم ہوں گے۔
انڈونیشین سفیر آدم ملاورمان نے دہشت گردی کے خاتمے اور افغان امن عمل کیلئے پاکستانی کردار کو سراہتے ہوئے کہا کہ پاکستان کے ساتھ تاریخی برادرانہ تعلقات کو قدر کی نگاہ سے دیکھتے ہیں، انڈونیشین سر مایہ کار پاکستان کے معاشی استحکام اور ترقی کیلئے اپنا کردار ادا کر رہے ہیں جبکہ دہشت گردی کے خاتمے اور امن کیلئے پاکستان کی قر بانیاں قابل تحسین ہیں۔
