اسلام آباد،05اگست (اے پی پی):وزیراعظم کے معاون خصوصی برائے امور نوجوانان اور سربراہ کامیاب جوان پروگروام عثمان ڈار نے کہا ہے کہ کامیاب جوان پروگرام نوجوانوں کو با اختیار بنانے اور روزگار کی فراہمی میں معاون ثابت ہوا، منصوبے کے ذریعے ہزاروں نوجوان اپنا ذاتی کاروبار اور روزگار حاصل کر چکے، پروگرام میں میرٹ اور شفافیت پر کسی قسم کا سمجھوتہ نہیں ہو سکتا۔
ان خیالات کااظہار انہون نے جمعرات کو یہاں پاکستان میں مقیم آئی ایم ایف کے نمائندہ ٹریسا ڈبن سنچے سے ملاقات میں گفتگو کرتے ہوئے کیا ،ملاقات کے دوران کامیاب جوان پروگرام کے ذریعے نوجوانوں میں قرض کی تقسیم اور تازہ اعداد و شمار کا جائزہ لیا گیا ۔سربراہ کامیاب جوان پروگرام نے منصوبے کے ڈیجیٹل ڈیش بورڈ پر بریفنگ بھی دی۔ اس موقع پر آئی ایم ایف کے نمائندہ نے پاکستان میں جاری کامیاب جوان پروگرام پر اعتماد کا اظہار کیا۔
عثمان ڈار نے کہا کہ پاکستان کی کل آبادی کا68 فیصد حصہ نوجوانوں پر مشتمل ہے، تقریباً 20 لاکھ نوجوان ہر سال جاب مارکیٹ میں داخل ہوتے ہیں۔انہوں نے کہا کہ نوجوانوں کو اتنی بڑی تعداد میں روزگار کے مواقع دینا بہت بڑا چیلنج تھا ، کامیاب جوان پروگرام نوجوانوں کو با اختیار بنانے اور روزگار کی فراہمی میں معاون ثابت ہوا منصوبے کے ذریعے ہزاروں نوجوان اپنا ذاتی کاروبار اور روزگار حاصل کر چکے۔
معاون خصوصی نے کہا کہ پروگرام میں میرٹ اور شفافیت پر کسی قسم کا سمجھوتہ نہیں ہو سکتا، نوجوانوں کو اسکلز سکالرشپ اور ہائی ٹیک کورسز کے تحت جدید ٹیکنالوجی سے بھی ہم آہنگ کیا جا رہا ہے۔
اس موقع پر آئی ایم ایف نمائندہ نے پروگرام کے تحت نوجوانوں کے لئے کئے اقدامات پر اطمینان کااظہار کیا ۔ ٹریسا ڈبن سنچے نے نوجوانوں کیلئے حکومتی اقدامات اور ویژن کو بھی سراہا اور پورٹل پر قرض کے اعداد و شمار کے حوالے سے دی گئی تفصیلی معلومات میں بھی دلچسپی کا اظہارکیا۔
ٹریسا ڈبن نے مستحق اور باصلاحیت نوجوانوں کو قرضہ سکیم سے متعلق معلومات تک رسائی دینے کی اہمیت پربھی زور دیا۔
