اسلام آباد،20اگست (اے پی پی):وزیر مملکت اطلاعات و نشریات فرخ حبیب نے کہا ہے کہ ایکسپورٹس میں اضافہ ہماری ترجیح ہے، پاکستان تحریک انصاف کے دورہ حکومت میں ٹیکسٹائل اور آئی ٹی ایکسپورٹس میں نمایاں اضافہ ہوا ہے ۔
وہ جمعہ کو وزارت اطلاعات و نشریات میں میڈیا سے گفتگو کر رہے تھے۔ وزیر مملکت فرخ حبیب نے کہا کہ پی ٹی آئی حکومت کے تین سال بہت بہتر تھے، ہماری حکومت کے آغاز پر معاشی بدحالی،ادارے تباہ حال تھے اور کچھ وقت کے بعد کورونا وائرس جیسی عالمی وباء کا سامنا کرنا پڑا اس کے باوجود ملکی معیشت کو چلتا رکھا اور 4فیصد جی ڈی پی گروتھ حاصل کی،برآمدات 25.4ارب رہیں اگر سروسز کو شامل کریں تو یہ 31ارب ڈالر بن جاتی ہے، ایک سال کے دوران 29.4ارب ڈالر ترسیلات زر پاکستان آئے۔
انہوں نے کہا کہ ہماری معاشی ٹیم کی محنت کی بدولت 10سالوں میں پہلی مرتبہ کرنٹ اکاؤنٹ خسارہ سرپلس ہوا، ٹیکسٹائل کے شعبے میں ریکارڈ برآمدات ہوئیں، 2ارب ڈالر کی آئی ٹی برآمدات بھی ریکارڈ ہیں۔ انہوں نے کہا کہ پہلی مرتبہ پاکستان میں ڈالر انفلو 60ارب ڈالر سے تجاوز کر چکا ہے،2018میں یہ 50ارب ڈالر سے بھی کم تھا۔ انہوں نے کہا کہ لارج سکیل منیوفیکچرنگ میں 14فیصد سے زائد گروتھ ہوئی ہے۔
وزیر مملکت نے کہا کہ گذشتہ سال کسانوں کو 1100ارب اضافی دیئے گئے، 500ارب گندم کے کسانوں کو دیئے گئے ہیں اسی وجہ سے گندم، چاول،مکئی ،گنے سمیت تمام پیدوارا ریکارڈ ہوئیں ہیں۔
