تاشقند، 25 اگست (اے پی پی ): پاکستان اور ازبکستان نے دو طرفہ تعلقات کو مزید مستحکم بنانے کیلئے اعلیٰ سطحی روابط کے فروغ پر اتفاق کیا ہے ۔
یہ اتفاق رائے وزیر خارجہ مخدوم شاہ محمود قریشی کی بدھ کو یہاں ازبکستان کے وزیر خارجہ عبدالعزیز کامیلوف کے ساتھ ملاقات کے دوران کیا گیا۔دوران ملاقات دو طرفہ تعلقات ،مختلف شعبہ جات میں دو طرفہ تعاون کے فروغ اور افغانستان کی صورتحال پر تفصیلی تبادلہ خیال ہوا۔دونوں وزرائے خارجہ نے اس بات پر بھی اتفاق کیا کہ پاکستان اور ازبکستان کے مابین اسٹریٹیجک شراکت داری اعلیٰ سطحی روابط کے فروغ کے باعث ممکن ہوئی ہے ۔دونوں وزرائے خارجہ نے وزیر اعظم عمران خان کے حالیہ دورہ ء ازبکستان کے دوران، دونوں ممالک کی قیادت کی جانب سے کیے گئے متفقہ فیصلوں پر جلد عملدرآمد یقینی بنانے پر اتفاق کیا۔
ملاقات میں دونوں وزرائے خارجہ نے خطے میں امن و امان بالخصوص افغانستان کی بدلتی ہوئی صورتحال پر تبادلہ ء خیال کیا۔ مخدوم شاہ محمود قریشی نے کہا کہ پاکستان، افغانستان میں قیام امن کیلئے جامع نوعیت کے سیاسی تصفیے کا حامی ہے، افغانستان میں قیام امن سے خطے میں تجارت اور علاقائی روابط کو فروغ ملے گا اور پورا خطہ یکساں طور پر مستفید ہو گا۔انہوں نے کہا کہ افغانستان میں صورتحال میں بگاڑ ، پورے خطے کے امن کو متاثر کر سکتا ہے۔
ازبک وزیر خارجہ نے افغانستان کی بدلتی ہوئی صورتحال اور درپیش چیلنجز سے نمٹنے اور علاقائی سطح پر متفقہ لائحہ عمل کی تشکیل کیلئے، پاکستان کی عملی کاوشوں کو سراہا۔ازبک وزیر خارجہ نے وزیر خارجہ کے اس دورے کو “بروقت” اور خصوصی اہمیت کا حامل قرار دیا اور دونوں وزرائے خارجہ نے خطے میں قیام امن کیلئے مشاورتی سلسلہ جاری رکھنے پر اتفاق کیا۔
