کراچی، 29 اگست (اے پی پی ):حکومت کی نوجوانوں کو بااختیار روزگار فراہم کرنے کی کوششیں،قرضوں کی تقسیم کا عمل تیز کر دیا گیا ہے ، روزگار حاصل کرنے والے نوجوانوں کی تعداد میں بھی اضافہ ہو رہا ہے ، جن کی تعداد 30 ہزار کے قریب پہنچ گئی ہیں ۔وفاقی حکومت نے تازہ ترین اعداد و شمار آئندہ چند روز میں جاری کرنے کا فیصلہ کیا ہے ،کامیاب جوان پروگرام کے ذریعے اب تک 25 ارب روپے کا قرض منظور کیا گیا ہے ۔
کراچی کا نوجوان محمد جنید بھی ہزاروں خوش نصیب نوجوانوں کی طرح کامیاب جوان پروگرام سے روزگار حاصل کر نے والوں میں شامل ہو گیا ہے ۔ جنید 15 سے 20 دن میں 70 ہزار روپے تک ماہانہ کمانے لگا۔
سربراہ کامیاب جوان پروگرام عثمان ڈار نے جنید کی ویڈیو سوشل میڈیا پر شئیر کرتے ہوئے نوجوانوں سے کامیاب جوان لون اسکیم سے فائدہ اٹھانے کی اپیل کی ہے ۔انہوں نے کہا کہ اس سکیم سے فائدہ اٹھاتے ہوئے کراچی کا نوجوان صرف 15 سے 20 دن میں ماہانہ 70 ہزار روپے تک کمانے کے قابل ہوا ہے ،کامیاب جوان پروگرام کے ذریعے ہزاروں نوجوان اپنے روزگار کا خواب پورا کر چکے ہیں۔
عثمان ڈار نے کہا کہ حکومت کے اس مثالی تعاون سے ہر نوجوان فائدہ اٹھا سکتا ہے، آج ہی کاروبار کی منصوبہ بندی کر کے قرض کیلئے بینک میں درخواست دیں۔انہوں نے کہا کہ ہم قرض کی تقسیم کے اپنے طے شدہ ہدف کے بہت قریب پہنچ چکے ہیں، آئندہ چند دنوں میں مکمل رپورٹ عوام کے سامنے پیش کروں گا۔
