اسلام آباد,9ستمبر (اے پی پی):صدر مملکت ڈاکٹر عارف علوی نے کہا ہے کہ پاکستان اپنی نئی “جیو اکنامک” پالیسی کے تحت دوست ممالک کے ساتھ معیشت ، ثقافت اور سیاحت کے شعبوں میں تعاون کو فروغ دینے کا خواہاں ہے، علاقائی معاشی انضمام سے پورے خطے کی نمو اور سماجی و اقتصادی ترقی میں مدد ملے گی۔ ان خیالات کا اظہار انہوں نے کرغزستان کے نامزد سفیر توتوئیف الان بیک اسنکولووچ ، قازقستان کے نامزد سفیر یرجان کستافین ، آذربائیجان کے نامزد سفیر خضر فرہادوف ، تھائی لینڈ کے نامزد سفیر چکرید کرچائیونگ اور نائجیریا کے نامزد ہائی کمشنر ابیوئے محمد بیلو کے ساتھ تبادلہ خیال کرتے ہوئے کیا جنہوں نے جمعرات کو یہاں ایوان صدر میں ان سے علیحدہ علیحدہ ملاقاتیں کیں۔ قبل ازیں نامزد سفیروں اور ہائی کمشنر نے ایک تقریب میں صدر مملکت کونے اپنی سفارتی اسناد پیش کیں۔ صدر مملکت نے کہا کہ پاکستان اپنی نئی “جیو اکنامک” پالیسی کے تحت دوست ممالک کے ساتھ کاروبار اور تجارتی تعاون کے فروغ کو خاص اہمیت دیتا ہے، پاکستان تجارت ، معیشت ، ثقافت اور سیاحت کے شعبوں میں دوطرفہ تعاون کو مزید وسعت دے کر روابط اور علاقائی امن و ترقی کا خواہاں ہے۔ صدر مملکت نے کہا کہ پاکستان منفرد جیو اقتصادی حیثیت کا حامل ملک ہے، خطے کے ممالک ٹرانسپورٹ ، تجارت اور ٹرانزٹ ٹریڈ کے شعبوں میں پاکستان میں مواقع سے فائدہ اٹھا سکتے ہیں۔ انہوں نے کہا کہ علاقائی معاشی انضمام سے پورے خطے کی نمو اور سماجی و اقتصادی ترقی میں مدد ملے گی، دوست ممالک کے ساتھ دوطرفہ تعلقات کو مزید مستحکم کرنے کے لیے دو طرفہ سیاسی مشاورتی، مشترکہ وزارتی اور بین الحکومتی کمیشنز جیسے ادارہ جاتی سطح کے اجلاس باقاعدگی سے منعقد کرانے کی ضرورت ہے۔ صدر مملکت نے دوست ممالک کے ساتھ دو طرفہ تعاون کی موجودہ سطح پر اطمینان کا اظہار کرتے ہوئے اس امید کا اظہار کیا کہ نامزد سفراء پاکستان کے ساتھ سیاسی ، معاشی اور ثقافتی تعلقات مزید مضبوط بنانے میں اپنا کردار ادا کریں گے۔
