اسلام آباد،10اکتوبر (اے پی پی):ایئر چیف مارشل (ریٹائرڈ) فاروق فیروز خان مرحوم کو مکمل فوجی اعزاز کے ساتھ پی اے ایف قبرستان نور خان میں سپرد خاک کر دیا گیا، نماز جنازہ میں چیئرمین جوائنٹ چیفس آف اسٹاف کمیٹی، سربراہ پاک فضائیہ، سربراہ پاک بحریہ نے شرکت کی، پاک فضائیہ کے چاق و چوبند دستے نے مرحوم کی قبر پر سلامی دی۔
ترجمان پاک فضائیہ کی طرف سے جاری بیان کے مطابق صدر پاکستان ،وزیراعظم ،چیئرمین جوائنٹ چیفس آف اسٹاف کمیٹی ،چیف آف آرمی اسٹاف ،چیف آف نیول اسٹاف ،چیف آف ایئر اسٹاف اور دیگر معززین کی جانب سے مرحوم کی قبر پر پھولوں کی چادریں چڑھائی گئیں۔ مرحوم کی نماز جنازہ میں چیئرمین جوائنٹ چیفس آف اسٹاف کمیٹی، سربراہ پاک فضائیہ، سربراہ پاک بحریہ، پی اے ایف کے سابق ایئر چیفس، اعلیٰ سول اور فوجی حکام نے شرکت کی۔
