اشک آباد،27نومبر (اے پی پی):صدر مملکت ڈاکٹر عارف علوی نے ترکمانستان کے صدر قربان قلی بردی محمدوف سے ہفتہ کو یہاں اقتصادی تعاون تنظیم کے 15 ویں سمٹ اجلاس کے موقع پر ملاقات کی ہے ۔صدر مملکت عارف علوی نے ملاقات میں ان کے اور ان کے وفد کے پرتپاک استقبال اور مہمان نوازی پر صدر بردی محمدوف کا شکریہ ادا کیا۔
ستمبر 2020 میں ہونے والی اپنی ٹیلی فونک گفتگو کو یاد کرتے ہوئے، دونوں رہنماؤں نے موجودہ سطح کے تعلقات کا جائزہ لیا اور باہمی دلچسپی کے تمام شعبوں میں دو طرفہ رابطوں کو بڑھانے پر زور دیا۔
صدر مملکت ڈاکٹر عارف علوی نے وسیع تر روابط کو یقینی بنا کر دوطرفہ تجارتی اور اقتصادی تعلقات کو بڑھانے کے لیے ٹھوس اقدامات کرنے کی ضرورت پر زور دیا۔ انہوں نے اس بات پر زور دیا کہ تجارت، سیاحت اور عوام کے درمیان رابطوں کو فروغ دینے کے لیے سڑک، ریل اور ہوائی رابطے ضروری ہیں۔ انہوں نے تاپی گیس پائپ لائن منصوبے کی بروقت تکمیل کے لیے پاکستان کی مسلسل حمایت کا اعادہ کیا۔
دونوں رہنماؤں نے علاقائی امن و سلامتی بالخصوص افغانستان میں بگڑتی ہوئی معاشی اور انسانی صورتحال پر بھی تبادلہ خیال کیا۔ صدر علوی نے افغانستان میں خاص طور پر سردیوں کی آمد کے پیش نظر انسانی مصائب کی سنگین صورتحال پر روشنی ڈالی۔ انہوں نے بین الاقوامی برادری کی طرف سے فوری خوراک، ادویات اور رہائش کی اشیاء کی فراہمی کے لیے افغانستان کے ساتھ عملی روابط کی اہمیت پر زور دیا۔ انہوں نے افغانستان کو معاشی تباہی سے بچنے کے لیے فوری طور پر مالی امداد کی ضرورت پر زور دیا۔
صدر مملکت ڈاکٹر عارف علوی نے اس سلسلے میں افغانستان کے منجمد مالیاتی اثاثوں کو غیر منجمد کرنے کی اہمیت پر بھی زور دیا۔انہوں نے اس بات پر بھی زور دیا کہ افغانستان میں پائیدار امن اور استحکام، علاقائی روابط اور خوشحالی کے ثمرات حاصل کرنے کے لیے ناگزیر ہے۔
دونوں رہنماؤں نے مشترکہ دلچسپی کے تمام امور پر رابطے میں رہنے پر اتفاق کیا۔ صدر مملکت نے صدر بردی محمدوف کو جلد از جلد پاکستان کا دورہ کرنے کی دعوت بھی دی۔
