اسلام آباد،9دسمبر (اے پی پی):وفاقی وزیر اطلاعات و نشریات چوہدری فواد حسین نے کہا ہے کہ شدت پسندی کی سرگرمیوں کو مسترد کرنے کے لئے کھیلوں کو فروغ دینا ہوگا، کھیلوں کی سرگرمیوں سے نوجوان طبقے میں تعمیری جذبہ پیدا ہوتا ہے، نوجوان کھیلوں میں اپنی صلاحیتیں نکھار کر دنیا میں ملک و قوم کا نام روشن کریں، کامیاب جوان سپورٹس ڈرائیو میں نوجوانوں کی شرکت حوصلہ افزاءہے، پاکستان کی گرلز پر فخر ہے جنہوں نے ہر میدان میں پاکستان کا ساتھ دیا۔
یہ بات انہوں نے جمعرات کو یہاں کامیاب جوان سپورٹس ڈرائیو کی اختتامی تقریب سے خطاب کرتے ہوئے کہی۔ وفاقی وزیر اطلاعات نے کہا کہ کامیاب جوان پروگرام کے تحت سپورٹس ڈرائیو کے پہلے روز 50 ہزار نوجوان یہاں اکٹھے ہوئے اور میلے کا سماں تھا، پروگرام میں 6 ہزار ایتھلیٹس نے شرکت کی جن میں 3300 لڑکے اور 2700 لڑکیاں تھیں۔ انہوں نے کہا کہ پاکستان کی گرلز پر فخر ہے جنہوں نے ہر میدان میں پاکستان کا ساتھ دیا۔ انہوں نے کہا کہ شدت پسندی کی سرگرمیوں کو مسترد کرنے کے لئے کھیلوں کا فروغ ضروری ہے، پاکستان کے نوجوان شدت پسندی کو مسترد کرتے ہوئے آگے بڑھ کر ملک و قوم کا نام روشن کریں۔
وفاقی وزیر اطلاعات نے کہا کہ پاکستان کرکٹ ٹیم نے حالیہ میچوں میں عمدہ کارکردگی کا مظاہرہ کیا، بنگلہ دیش اور بھارت کو شکست دی، پوری قوم نے پاکستان کرکٹ ٹیم کی کامیابی کا جشن منایا۔ انہوں نے کہا کہ کامیاب جوان سپورٹس ڈرائیو صوبوں میں بھی ہوگی، 12 اکیڈمیاں بنائی جا رہی ہیں۔
وفاقی وزیر اطلاعات نے کامیاب جوان سپورٹس ڈرائیو کے کامیاب انعقاد پر مبارکباد پیش کرتے ہوئے کہا کہ سپورٹس ڈرائیو کا سلسلہ طویل مدت تک جاری رہے گا، انشاءاللہ پاکستان اولمپکس میں میڈل جیتے گا۔
سورس:و ی این ایس، اسلا م آباد
