اسلام آباد،18 دسمبر(اے پی پی): وفاقی وزیر خارجہ شاہ محمود قریشی نے کہا ہے کہ
پاکستان، ملائشیا کے ساتھ اقتصادی، تجارتی، دفاعی، تعلیمی، سیاحتی، اور سائنسی شعبہ جات میں دو طرفہ تعاون کے فروغ کیلئے پر عزم ہے۔اہم علاقائی و عالمی امور کے حوالے سے بین الاقوامی فورمز پر پاکستان اور ملایشیا کے مابین نقطہ نظر میں مماثلت خوش آئند ہے۔
ان خیالات کا اظہار وزیر خارجہ شاہ محمود قریشی نے ہفتہ کو یہاں او آئی سی وزرائے خارجہ کونسل کے غیر معمولی اجلاس میں شرکت کیلئے تشریف لائے ہوئے ملایشیاء کے وزیر خارجہ سیف الدین عبداللہ سے گفتگو میں کیا، جنہوں نے وزیر خارجہ سے وفد کے ہمراہ وزارتِ خارجہ میں ملاقات کی۔دوران ملاقات دو طرفہ تعلقات ،علاقائی صورتحال سمیت باہمی دلچسپی کے امور پر تبادلہ خیال کیا گیا۔وزیر خارجہ شاہ محمود قریشی نے وزیر خارجہ ملائشیاء کا منصب سنبھالنے پر سیف الدین عبداللہ کو مبارکباد دی۔
وزیر خارجہ مخدوم شاہ محمود قریشی نے ایف اے ٹی ایف کے معاملے پر پاکستان کے موقف کی مسلسل حمایت پر ملیشین ہم منصب کا شکریہ ادا کیا۔ وزیر خارجہ نے کورونا وباء کے دوران پاکستان واپسی کے منتظر دو ہزار پاکستانیوں کو وطن واپسی میں سہولت کی فراہمی پر بھی ملیشین قیادت کا شکریہ ادا کیا ۔
ملاقات میں وزیر خارجہ نے پاکستان اور ملائشیا کے درمیان عوام کی سطح پر روابط کے فروغ کیلئے سفری پابندیوں پر نظرثانی کی ضرورت پر زور دیا۔انہوں نے کہا کہ پاکستان، مارچ 2022 میں او آئی سی وزرائے خارجہ کونسل کے اڑتالیسویں اجلاس کی میزبانی کیلئے تیار ہے، یکے بعد دیگرے دو وزرائے خارجہ کونسل کے اجلاسوں کی میزبانی، مسلم امہ کیلئے پاکستان کی سنجیدہ سوچ کی عکاسی کرتی ہے۔
مخدوم شاہ محمود قریشی نے کہا کہ پاکستان، او آئی سی کو مسلم امہ کی مستحکم آواز گردانتے ہوئے، اسلامو فوبیا، امن و سلامتی اور تنازعات کے حل کیلئے او آئی سی کے موثر کردار کا متقاضی ہے۔انہوں نے کہا کہ چالیس سال کی جنگ و جدل کے بعد افغانستان میں قیام امن کی ایک امید دکھائی دی ہے، افغانستان میں ابھرتے ہوئے انسانی بحران کے لیے فوری اقدامات نہ کیے گئے تو اس کے مضمرات ہمسایہ ممالک، خطے اور دنیا بھر کو متاثر کر سکتے ہیں۔
مخدوم شاہ محمود قریشی نے کہا کہ ہم مسئلہ کشمیر کے حوالے سے او آئی سی کی مسلسل اور غیر متزلزل حمایت پر او آئی سی کے شکر گزار ہیں، ستاون مسلم ممالک کی آواز کی حامل او آئی سی، اقوام متحدہ کی قراردادوں کے مطابق مسئلہ کشمیر کے منصفانہ حل کیلئے موثر کردار ادا کر سکتی ہے۔
ملائشیاء کے وزیر خارجہ سیف الدین عبداللہ نے پرتپاک خیر مقدم اور پر خلوص میزبانی پر وزیر خارجہ مخدوم شاہ محمود قریشی کا شکریہ ادا کیا۔
سورس: وی این ایس، اسلام آباد
