پنڈدادنخان، 19 فروری (اے پی پی ): وفاقی وزیر اطلاعات ونشریات چوہدری فواد حسین نے کہا ہے کہ ملک کا وزیراعظم اور عوامی نمائندہ وہ ہونا چاہیے جو لوگوں کی عزت میں اضافہ کر سکے، عمران خان کے لیول کا کوئی لیڈر پاکستان میں موجود نہیں ہے۔
ہفتہ کو یہاں میڈیا سے گفتگو کے دوران وفاقی وزیر کا کہنا تھا کہ ہمارے مخالفین سیاسی بونے ہیں، ان کی آواز عالمی سطح پر نہیں سنی جاتی۔اسلامو فوبیا سمیت مختلف معاملات پر عالمی برادری نے عمران خان کے موقف کو ہمیشہ سنا ہے۔انہوں نے کہا کہ دورہ چین کے موقع پر وزیراعظم عمران خان کا شاندار استقبال کیا گیا،23سال بعد کوئی بھی پاکستانی لیڈر ماسکو کا دورہ کرنےجا رہا ہے جبکہ وزیراعظم عمران خان کا دورہ روس گیم چینجر ہو گا، چین کے بعد روس کے ساتھ پاکستان کے مستحکم تعلقات قائم ہونے جا رہے ہیں۔
چوہدری فواد حسین نے کہا کہ مریم نواز لندن سے اپنے پیسے واپس لے آئیں تو حالات کافی بہتر ہو جائیں گے،مریم نواز کو احساس ہے تو اپنے ابو اور بھائیوں سے کہیں کہ پاکستانیوں کا پیسہ واپس کریں۔انہوں نے کہا کہ اپوزیشن سینیٹ میں اکثریت کے باوجود اپنے ووٹ پورے نہیں کروا سکی،اپوزیشن میں جرات ہے تو کل ہی عدم اعتماد لے کر آئیں۔
وفاقی وزیر اطلاعات ونشریات نے کہا کہ عمران خان کی حکومت کو وفاق اور پنجاب میں کوئی خطرہ نہیں جبکہ جہانگیر ترین کے ساتھ احترام کا تعلق ہے ، توقع ہے کہ وہ پارٹی کے ساتھ رہیں گے۔
وفاقی وزیر نے کہا کہ جہلم میں بلدیاتی انتخاب پہلے مرحلے میں ہے،پی ٹی آئی کے کارکن کمر کس لیں جبکہ جہلم کے عوام سے کیے گئے تمام وعدے پورے کیے ہیں۔انہوں نے کہا کہ وقت آ گیا ہے کہ جہلم کے لوگوں کا اعتماد دوبارہ حاصل کی جائے۔ماضی کی طرح اس بار بھی پی ٹی آئی جہلم میں کلین سویپ کرے گی۔
انہوں نے مزید کہا کہ محسن بیگ نے مراد سعید کیلئے جو بیہودہ زبان استعمال کی اس پر ایف آئی اے نے کارروائی کی،پاکستان کا کوئی بھی شخص محسن بیگ جیسے طرز کلام کی حمایت نہیں کرتا،قانون انہیں احترام سکھانا چاہتا ہے۔مراد سعیدنے آگے بڑھ کے معاملے پر ایف آئی آر درج کرائی،پوری قوم ان کے ساتھ کھڑی ہے۔
سورس : وی این ایس ، اسلام آباد
