اسلام آباد،11مارچ (اے پی پی):چیئرمین سینیٹ محمد صادق سنجرانی سے جاپان کے سفیر متسوہیرو واڈا نے جمعہ کو پارلیمنٹ ہائوس میں ملاقات کی،ملاقات میں دو طرفہ تعلقات سمیت باہمی دلچسپی کے امور پر تبادلہ خیال کیا گیا جبکہ دونوں ممالک کے مابین دوطرفہ اقتصادی تعاون کو مزید وسعت دینے کی ضرورت پر زور دیا گیا۔
چیئرمین سینیٹ نے کہا کہ ایشیاء میں ایک انتہائی اہم ملک کے طور پر پاکستان جاپان کے ساتھ اپنے تعلقات کو بہت اہمیت دیتا ہے، جاپان ایک مستحکم معاشی ملک ہے اور ہم جاپان کے بہتر معاشی ماڈل کی تقلید کرنے کے خواہاں ہیں۔ چیئرمین سینیٹ نے کووڈ۔19 سے نمٹنے کیلئے جاپان کیلئے نیک خواہشات کا اظہار کیا۔ انہوں نے دوطرفہ تعلقات مزید مضبوط بنانے کے لئے مکمل تعاون کی یقین دہانی کرائی۔
محمد صادق سنجرانی نے کہا کہ دونوں ممالک سال 2022 کو سفارتی تعلقات کے قیام کی 70 ویں سالگرہ کے طور پر منا رہے ہیں اور اس حوالے سے وزارت خارجہ اور مشن مختلف تقریبات کے انعقاد کیلئے کام کر رہے ہیں، پاکستان اور جاپان کے درمیان بات چیت کیلئے دو طرفہ ادارہ جاتی میکانزم موجود ہے۔ چیئرمین سینیٹ نے دوطرفہ تعلقات کے فروغ کیلئے دونوں ممالک کے مابین بات چیت کا سلسلہ جاری رکھنے کی ضرورت پر زور دیا۔
چیئرمین سینیٹ نے کہا کہ 2019 میں ٹیکنیکل انٹرن ٹریننگ پروگرام اور مخصوص ہنر مند ورکرز جیسے پروگراموں پر تعاون کی یادداشت پر دستخط کرنے کے بعد اب اس پر عمل درآمد کیلئے کوششیں تیز کرنی چاہئے۔ جاپانی حکومت کی جانب سے جی ڈی ایس اسکالرشپ پروگرام میں پاکستان کو شامل کرنے پر شکر گزار ہیں۔ انہوں نے کہا کہ اسکالرشپ پروگرام کے تحت پاکستان کے 20 طلباء کو جاپان کی یونیورسٹیز کے گریجویٹ پروگرام میں حصہ لینے کا موقع ملا ہے۔
چیئرمین سینیٹ محمد صادق سنجرانی نے کہا کہ ہماری وزارت تجارت نے اوساکا 2025 ایکسپو میں شرکت کے لیے اپنی رضا مندی ظاہر کر دی ہے۔ پاکستان نے 2025 ایکسپو کی میزبانی کے لیے جاپان کے حق میں ووٹ بھی دیا تھا۔ متعدد پاکستانی کمپنیاں اپنے جاپانی ہم منصبوں کے ساتھ جوائنٹ وینچرز میں جانا چاہتی ہیں لیکن کوویڈ 19 کے باعث ویزا پابندیوں کی وجہ سے وہ جاپان نہیں جا سکتیں۔ انہوں نے کہا کہ جاپانی حکومت پاکستان کیلئے بزنس ویز ے کھولنے پر غور کرے تاکہ پاکستانی تاجر جاپان کا سفر کر سکیں، جاپان پاکستان کے حوالے سے اپنی سیکورٹی سے متعلق ٹریول ایڈوائزری پر نظر ثانی کرے تاکہ سرمایہ کاری اور سیاحت کو فروغ مل سکے۔
چیئرمین سینیٹ نے پاکستان کو مسلسل اقتصادی اور تکنیکی مدد فراہم کرنے پر جاپانی حکومت کا شکریہ ادا کیا۔ انہوں نے ملاقات میں وسطی ایشیا کے ساتھ علاقائی رابطہ کاری کی اہمیت کو بھی اجاگر کیا۔ انہوں نے کہا کہ پاکستان میں مختلف شعبوں میں سرمایہ کاری کے وسیع مواقع موجود ہیں جس سے جاپان کے تاجروں کو فائدہ اٹھانا چاہئے۔
سورس:وی این ایس، اسلا م آباد
