تہران:20 جون (اے پی پی):وفاقی وزیر برائے بجلی انجینئر خرم دستگیر خان نے پاکستان اور ایران کے درمیان توانائی کے شعبے میں تعاون کو سراہتے ہوئے کہا ہے کہ پاکستان اور ایران توانائی کے شعبے میں تعاون کو فروغ دیں گے۔
وفاقی وزیر برائے بجلی انجینئر خرم دستگیر خان نے پیر کو یہاں ایران کے وزیر توانائی علی اکبری محرابیان سے ون آن ون ملاقات کی۔ ملاقات کا مقصد دونوں پڑوسیوں کے درمیان توانائی کے شعبے میں تعاون کی راہیں بڑھانا تھا جبکہ ملاقات میں پولن سے گوادر تک بجلی کی فراہمی کے مختلف پہلوؤں پر تبادلہ خیال کیا گیا۔
وفاقی وزیر برائے بجلی انجینئر خرم دستگیر خان نے پاکستان اور ایران کے تعلقات کو مضبوط بنانے کے لیے پاکستان کے عزم کا اعادہ کرتے ہوئے بجلی کی درآمد کے منصوبے کو تیز کرنے کی ضرورت پر زور دیا۔
ملاقات میں طویل مدتی اور قلیل مدتی توانائی کے منصوبوں پر بھی تبادلہ خیال کیا گیا۔
