لندن۔19اگست (اے پی پی):ڈپٹی سپیکر قومی اسمبلی زاہد اکرم درانی نے لندن میں سابق وزیراعظم میاں محمد نواز شریف سے ملاقات کی ۔اس موقع پرسابق وزیر خزانہ اسحاق ڈار بھی موجود تھے۔ قومی اسمبلی سیکرٹریٹ کے مطابق ملاقات میں پاکستان کی مجموعی سیاسی اور معاشی صورتحال پر تبادلہ خیال کیا گیا ۔ زاہد اکرم درانی نے کہا کہ پاکستان کو سیاسی اور معاشی استحکام کی ضرورت ہے۔موجودہ حکومت کو ملک معاشی طور پر سنگین بحرانوں میں گھرا ہوا ملا ہے ۔ موجودہ حکومت نے وزیراعظم شہباز شریف کی قیادت میں ملک کو درپیش چیلنجز سے نمٹنے کا عزم کیا ہے۔سابق دور حکومت میں پاکستان کو معاشی دلدل میں دھکیل دیا گیا ۔ وزیراعظم شہباز شریف ملک کو ترقی کی راہ پر گامزن کرنے کے لئے دن رات محنت کر رہے ہیں۔پاکستان اس وقت ایک مشکل دور سے گزر رہا ہے۔ ڈپٹی سپیکر نے کہا کہ پاکستان کو معاشی طور پر مضبوط بنانے کے لئے تمام سیاسی جماعتوں کو سیاست سے بالاتر ہو کر سوچنا ہو گا۔ سابق وزیر اعظم نواز شریف نے کہا کہ 2018 کا پاکستان معاشی طور پر مضبوط اور مستحکم پاکستان تھا۔پاکستان میں سیاسی عدم استحکام کی ملکی عوام نے بھاری قیمت چکائی ہے۔
