اسلام آباد،23اگست (اے پی پی):وفاقی وزیر برائے قومی صحت عبدالقادر پٹیل نے کہا ہے کہ وزرات صحت اس مشکل گھڑی میں سیلاب زدگان کے ساتھ ہے،سیلاب زدگان کے لیے کل ڈونرز کا اجلاس بلا رہے ہیں،حالیہ سیلاب کے باعث تباہ کاریاں ہوئی ہیں، سیلاب زدگان کی مدد کے لئے تمام تر طبی سہولیات فراہم کر رہے ہیں۔
منگل کو یہا ں میڈیاسے گفتگو کرتے ہوئے انہوں نے کہاکہ حالیہ سیلاب کے باعث تباہ کاریاں ہوئی ہیں ، وزرات صحت مشکل گھڑی میں سیلاب زدگان کے ساتھ ہے۔ انہوں نے کہاکہ ضلع لسبیلا میں ڈاکٹرز کی 12 رکنی ٹیم بھجوائی گئی تھی ۔ ویکیسن کی تیس ہزار ، ادویات کی ایک لاکھ خوراکوں کا ٹرک پہلے بھجوایا ، ویکیسن کی مزید دو لاکھ خوراکیں بھجوائی گئی ہیں ۔انہوں نے کہاکہ بلوچستان کو 36 ہزار میڈیکیٹڈ مچھر دانیاں مہیا کر چکے ،مزید 14 لاکھ پائپ لائن میں ہیں ۔ سندھ کے لیے چھ لاکھ مچھر دانیاں تین روز تک بھجوا دی گئی ہیں ۔
وفاقی وزیر برائے قومی صحت عبدالقادر پٹیل نے کہا کہ ڈیڑھ کروڑ روپے کی مزید ادویات بلوچستان اور سندھ بھجوا رہے ہیں۔ سانپ کاٹنے کی ویکسین وافر مقدار میں موجود ہیں جبکہ خواتین کے لیے ڈلیوری کٹس بھی بھجوا رہے ہیں ۔ انہوں نے کہاکہ سیلاب زدگان کے لیے کل ڈونرز کا اجلاس بلا رہے ہیں ، لسبیلا ڈسٹرکٹ کا انفراسٹرکچر مکمل طور پر تباہ ہو چکا ہے ، تباہی کو حکومتی سطح پر اکیلے حل نہیں کر سکتے ۔
اے پی پی /ڈیسک/حامد
