اسلام آباد،10فروری(اے پی پی):وزیر اعظم محمد شہباز شریف نے وفاقی وزیر داخلہ کو چاروں صوبوں کا دورہ کرنےکی ہدایت کرتے ہوئے کہا ہے کہ کسی قسم کا سکیورٹی لیپس برداشت نہیں کیاجائے گا،امن و امان کے حوالہ سے وفاق اور صوبوں میں رابطوں اور ہم آہنگی مزید بہتر کی جائے، تمام صوبوں میں کاؤنٹر ٹیررازم ڈیپارٹمنٹس کی استعداد کار میں بہتری لانے کے لئے مؤثر اقدامات کئے جائیں، قانون نافذ کرنے والے اداروں کو جدید ہتھیاروں اور سامان سے لیس کیا جائے ،اپیکس کمیٹی میں کئے گئے فیصلوں پر بھرپور عملدرآمد یقینی بنایا جائے۔
وزیراعظم محمد شہباز شریف کی زیر صدارت ملک میں امن و امان کی مجموعی صورتحال پر ایک اہم اجلاس منعقد ہوا۔ اجلاس میں چاروں صوبوں ، اسلام آباد ، گلگت بلتستان اور آزاد جموں و کشمیر کے سیکورٹی کےامور کا جائزہ لیا گیا۔ اجلاس کے شرکاء سے گفتگو کرتے ہوئے وزیراعظم نے کہا کہ شہریوں کی حفاظت حکومت کی اولین ذمہ داری ہے اس سلسلے میں کوتاہی کی کوئی گنجائش نہیں ہے اور کسی قسم کا سکیورٹی لیپس برداشت نہیں کیا جائے گا۔
وزیراعظم نے وفاقی وزیر داخلہ کو چاروں صوبوں کا دورہ کرنے کی ہدایت کرتے ہوئے کہا کہ امن و امان کے حوالے سے وفاق اور صوبوں میں رابطوں اور ہم آہنگی مزید بہتر کی جائے ۔ انہوں نے مزید ہدایت کی کہ تمام صوبوں میں کاؤنٹر ٹیررازم ڈیپارٹمنٹس کی استعداد کار میں بہتری لانے کے لئے مؤثر اقدامات کئے جائیں ،قانون نافذ کرنے والے اداروں کو جدید ہتھیاروں اور سامان سے لیس کیا جائے ۔ انہوں نے تاکید کی کہ اپیکس کمیٹی میں کئے گئے فیصلوں پر بھرپور عملدرآمد یقینی بنایا جائے۔
اجلاس کو بتایا گیا کہ ملک کے بڑے شہروں میں سیف سٹی پراجیکٹس کو مزید مؤثر بنانے کے اقدامات کے گئے ہیں۔ اجلاس کو مزید بتایا گیا کہ وزیراعظم کی ہدایت پر وفاقی سیکرٹری داخلہ نے حال ہی میں چاروں صوبوں کا دورہ کیا جس میں امن و امان کے حوالے سے صوبوں کو درپیش مسائل اور درکار وسائل کا جائزہ لیا گیا۔
اجلاس میں وفاقی وزیر داخلہ رانا ثنا اللہ ، وزیراعظم کے معاونین خصوصی سید طارق فاطمی،جہانزیب خان، چاروں صوبوں ، گلگت بلتستان ، آزاد جموں و کشمیر کے چیف سیکرٹریز ، اسلام آباد کیپٹل ٹیریٹری کے چیف کمشنر، چاروں صوبوں ، گلگت بلتستان ، آزاد جموں و کشمیر اسلام آباد کے آئی جیز پولیس اور متعلقہ سرکاری افسران نے شرکت کی۔
