سکھر،23مئی(اے پی پی):سرسو نے سندھ میں سیلاب سے متاثرہ کمیونٹیز کے لیے ہنگامی صحت، تحفظ اور صفائی کے منصوبہ کا آغاز کیا ہے۔ سندھ میں سیلاب سے متاثرہ کمزور کمیونٹیز کی مدد کے لیے ایک اہم کوشش کے تحت سندھ رورل سپورٹ آرگنائزیشن ( سرسو ) نے مربوط ہنگامی صحت، تحفظ، اور صفائی (پانی، صفائی، اور حفظان صحت) کے لیے منصوبہ کا آغاز کردیا ہے، اس حوالے سے ایک ورکشاپ کا کامیابی سے انعقاد کیا گیا۔
سرسو ترجمان جمیل سومرو کے مطابق مالٹیزر انٹرنیشنل کے تعاون سے اور جرمن وفاقی دفتر خارجہ (جی ایف ایف او) کی طرف سے مالی اعانت سے یہ منصوبہ شروع کیا گیا ہے۔اس منصوبہ کا مقصد سب سے زیادہ متاثرہ علاقوں میں ضروری اور زندگی بچانے والی صحت، صفائی اور تحفظ خوراک کی خدمات فراہم کرنا ہے۔خیرپور میرس اور میرپور خاص اضلاع کی پانچ یونین کونسلز کو منتخب کیا گیا ہے اور ان میں دسمبر 2023 تک عمل درآمد مکمل کیا جائے گا۔ یہ منصوبہ اہم صحت کی دیکھ بھال، صفائی ستھرائی کی سہولیات، تحفظ کی خدمات، اور سیلاب سے متاثرہ کمیونٹیز کے لیے غذائیت کی صورتحال کو بہتر بنانے تک رسائی کا محور ہے۔ ورکشاپ کے دوران سینئر ایس آر ایس او مینجمنٹ بشمول چیف فنانشل آفیسر، آصف کھڑو، ریجنل جنرل منیجر ڈاکٹر غلام رسول، سینئر منیجر نوید اسحاق میمن، سینئر منیجر ایڈمنسٹریشن شاہ زیب مہر، سینئر منیجر شازیہ لاڑک اور دیگر نے خطاب کیا۔ اس تربیتی پروگرام میں دونوں اضلاع کے سیکٹر ہیڈز آف فنانس، پروکیورمنٹ، پی آئی ٹی ڈی پراجیکٹ کا عملہ اور دیگر اقوام متحدہ، مقامی این جی اوز سمیت ضلعی انتظامیہ اور ضلع خیرپور کے مختلف سرکاری محکموں کے افسران موجود تھے۔
پراجیکٹ کے فوکل پرسن، نعمت اللہ ساوند نے پراجیکٹ کے مقاصد، متوقع نتائج، مقررہ اہداف، اور مجوزہ مداخلتوں پر روشنی ڈالی۔انہوں نے کہا کہ اس اقدام کے تحت سیلاب سے متاثرہ کمیونٹیز زندگی بچانے والی ادویات اور سامان تک بہتر رسائی سے مستفید ہوں گی۔ مزید برآں، متاثرہ آبادی کی مخصوص ضروریات کو پورا کرنے کے لیے صنف کے لحاظ سے موزوں لیٹرین تعمیر کی جائیں گی۔ انہوں نے مزید کہا کہ کمیونٹیز کی حفاظت اور بہبود کو یقینی بناتے ہوئے روک تھام اور ردعمل کے تحفظ کی خدمات بھی قائم کی جائیں گی۔ انہوں نے کہا کہ اس منصوبے کا مقصد حاملہ اور دودھ پلانے والی خواتین (PLW) اور غذائی قلت کے شکار بچوں کے ساتھ ساتھ معذور افراد کے لیے نقد امداد کی مد میں غذائیت اور خوراک تک رسائی کو بڑھانا ہے، یہاں یہ بات قابل ذکر ہے کہ سرسو مالٹیزر انٹرنیشنل کی مشترکہ کاوشوں اور جرمن وفاقی دفتر خارجہ کی فراخدلی سے فنڈنگ کے ساتھ، یہ مربوط ایمرجنسی رسپانس پروجیکٹ سندھ میں سیلاب سے متاثرہ کمیونٹیز کی زندگیوں پر نمایاں اثر ڈالنے کی امید ہے۔ اہم صحت کی دیکھ بھال، صفائی ستھرائی اور تحفظ کی خدمات فراہم کرکے، یہ منصوبہ سیلاب کی وجہ سے ہونے والے مصائب کو کم کرنے اور متاثرہ آبادی کی طویل مدتی بہبود میں حصہ ڈالنے کی کوشش پر مبنی ہے۔
