اسلام آباد،23اکتوبر (اے پی پی):نگراں وزیرِ اعظم انوار الحق کاکڑ نے کہا ہے کہ ڈالر کی قیمت میں استحکام اور پٹرولیم مصنوعات کی قیمتوں میں کمی کی بدولت مجموعی طور پر 41 ارب روپے کی بچت ہوئی ہے جس کا ریلیف عام آدمی تک پہنچے گا، پٹرولیم مصنوعات کی قیمتوں میں کمی کے فوائد عام آدمی تک پہنچانے کیلئے اقدامات تیز کئے جائیں، ذخیرہ اندوزوں اور منافع خوروں سے آہنی ہاتھوں سے نمٹا جائے، سمگلروں اور بجلی چوروں کو کوئی رعایت نہ دی جائے۔
ان خیالات کا اظہار انہوں نے پیر کو یہاں پٹرولیم مصنوعات کی قیمتوں میں کمی کے اثرات عام آدمی تک پہنچانے اور قیمتوں میں کمی یقینی بنانے کے حوالے سے جائزہ اجلاس کی صدارت کرتے ہوئے کیا۔ اجلاس میں نگراں وفاقی وزراء مرتضیٰ سولنگی، گوہر اعجاز، کوثر عبداللہ ملک، سمیع سعید، محمد علی اور متعلقہ اعلیٰ حکام نے شرکت کی جبکہ نگراں وزراء اعلیٰ محسن نقوی، جسٹس (ر) مقبول باقر، اعظم خان، چاروں صوبوں کے چیف سیکرٹریز اور متعلقہ اعلیٰ حکام وڈیو لنک کے ذریعے اجلاس میں شریک ہوئے۔ اجلاس کو تمام صوبوں کی میں اشیاءِ خورونوش و ضروریہ اور قومی سطح پر مہنگائی کے تناسب میں کمی کے اشاریے پیش کئے گئے۔
اجلاس کو مختلف اشیاءِ ضروریہ بشمول خشک راشن، اجناس، آٹے، چینی، گھی و تیل، سبزیوں و پھلوں گوشت وغیرہ کے نرخوں میں کمی کے حوالے سے بھی بریفنگ دی گئی۔ اجلاس کو بتایا گیا کہ تمام صوبوں میں پرائس مجسٹریٹ ضلعی سطح پر پٹرولیم مصنوعات میں کمی کے فوائد عام آدمی تک پہنچانے کیلئے سرگرم ہیں۔
وزیرِ اعظم نے ہدایت کی کہ ذخیرہ اندوزوں اور ناجائز منافع خوروں کے خلاف آہنی ہاتھ سے نمٹا جائے اور سمگلنگ و بجلی چوروں کو کوئی رعایت نہ دی جائے۔اجلاس کو پٹرولیم مصنوعات کی قیمتوں میں حالیہ کمی اور سمگلنگ و بجلی چوری کے خلاف آپریشن کے نتائج کے حوالے سے آگاہ کیا گیا۔ اجلاس کو بتایا گیا کہ پٹرولیم مصنوعات کی قیمتوں میں حالیہ کمی کی بدولت مہنگائی کی شرح میں 1.7 فیصد کمی ہوئی جو گزشتہ ایک برس میں سب سے زیادہ کمی ہے۔
اجلاس کو بتایا گیا کہ انتظامیہ کی کوششوں کی بدولت قومی سطح پر 24 اشیاءِ ضروریہ کی قیمتوں میں کمی واقع ہوئی ہے، زرعی پیداوار، بجلی، کرایوں اور صنعتی پیداوار کی قیمتوں میں خاطر خواہ کمی یقینی بنائی جارہی ہے۔ اجلاس کو بتایا گیا کہ وزارت منصوبہ بندی کی جانب سے اشیاءِ خورونوش و ضروریہ کی قیمتوں کی مانیٹرنگ اور فیصلہ سازی کیلئے قومی ادارہ شماریات کی تیار کردہ Decision Support System for Inflation ایپ کا استعمال کیا جارہا ہے۔ چاروں صوبوں میں صوبائی انتظامیہ کے اقدامات کی بدولت سفری کرایوں میں اوسطًا 10 فیصد کمی واقع ہوئی ہے۔
اجلاس کو بتایا گیا کہ ذخیرہ اندوزوں اور ناجائز منافع خوروں کے خلاف آپریشن کیا جارہا ہے، ضلعی انتظامیہ پٹرولیم مصنوعات کی قیمتوں میں کمی کے نتیجہ میں اشیاءِ خورونوش و ضروریہ کی قیمتوں میں کمی یقینی بنا رہی ہے۔ اجلاس میں سندھ، خیبر پختونخوا اور پنجاب کے وزراءِ اعلی اور بلوچستان کے چیف سیکرٹری نے اپنے اٹھائے گئے اقدامات پر بریفنگ دی۔
اجلاس میں وزیراعظم نے پٹرولیم مصنوعات کی قیمتوں میں کمی، ڈالر کی قیمت میں استحکام اور سمگلنگ کی روک تھام کے اثرات عام آدمی تک پہنچانے کے لئے تمام انتظامیہ کی کوششوں کو سراہا۔ وزیراعظم نے ہدایت کی کہ پٹرول کی قیمت میں 12.38 فیصد اور ڈیزل کی قیمت میں 4.7 فیصد کمی کے فوائد عام آدمی تک جلد سے جلد پہنچائے جائیں، ڈالر کی قیمت میں استحکام اور پٹرولیم مصنوعات کی قیمتوں میں کمی کی بدولت مجموعی طور پر 41 ارب روپے کی بچت ہوئی ہے جس کا ریلیف عام آدمی تک پہنچے گا، پٹرولیم مصنوعات کی قیمتوں میں کمی کے فوائد کو عام آدمی تک پہنچانے کیلئے اقدامات تیز کئے جائیں۔
وزیراعظم نے ہدایت کی کہ ذخیرہ اندوزوں اور منافع خوروں سے آہنی ہاتھوں سے نمٹا جائے، بجلی چوری کی روک تھام اور سمگلنگ کے خلاف آپریشن سے عام صارف کو فائدہ ہوا ہے، انسداد سمگلنگ آپریشن کا براہِ راست فائدہ عوام کو ہو رہا ہے۔ انہوں نے کہا کہ بلوچستان میں گندم کی قیمت میں 18 فیصد اور چینی کی قیمت میں اوسطاً 16 فیصد کمی خوش آئند ہے۔
