سکھر، 30 اکتوبر (اے پی پی):سیلاب متاثرہ علاقوں کے بچوں کے تحفظ بارے سندھ رورل سپورٹ آرگنائزیشن (سرسو)کے زیر اہتمام سرکاری اساتذہ کے لئے تربیتی پروگرام کا انعقاد کیا گیا ۔
ترجمان سرسو جمیل احمد کے مطابق سکول اور گاؤں کی سطح پر سکھر ڈویژن میں سیلاب سے متاثرہ علاقوں میں بچوں کی حفاظت کے لیے سندھ رورل سپورٹ آرگنائزیشن (سرسو)، جرمن فیڈرل فارن آفس، اے ڈی ایچ اے اور مالٹیرز انٹرنیشنل کے تعاون سے ایک مشترکہ جامع تربیتی پروگرام کا انعقاد کیا گیا ۔ گورنمنٹ ہائی سکول ٹھری میرواہ ( ضلع خیرپور) میں تین دنوں تک جاری رہنے والے اس پروگرام کو سرکاری اساتذہ کو آفات کے بعد محفوظ تعلیمی ماحول قائم کرنے کے لیے درکار علم اور ہنر کی تربیت دینے کیلئے تربیتی پروگرام کا انعقاد کیا گیا۔اس پراجیکٹ کا مقصد اساتذہ کو سیلاب کے دوران اور بعد میں بچوں کی مؤثر طریقے سے حفاظت کے لیے ضروری آلات سے آراستہ کرناہے۔ چائلڈ پروٹیکشن یونٹ خیرپور کے ساتھ قریبی ہم آہنگی میں ماسٹر ٹرینر کے ذریعے حکومت سندھ کے محکمہ تعلیم کے نامزد اساتذہ (15 مرد اور 05 خواتین) کو خصوصی تربیت فراہم کی گئی ۔سرسو کا مقصد حفاظت اور تحفظ کے کلچر کو فروغ دینا اور تعلیم کے میدان میں پوری کمیونٹی کو فائدہ پہنچانا ہے۔ اس ٹریننگ پروگرام کا دورہ ماہر تعلیم دانوں نے بھی کیا جن میں ڈسٹرکٹ ایجوکیشن آفیسر، اسسٹنٹ ایجوکیشن آفیسر و دیگر حکام بھی شامل تھے، ان کی موجودگی نے تربیت کے مواد اور مقاصد کی اہمیت اور پہچان کو اجاگر کیا اور اساتذہ میں سرٹیفیکیٹس بھی تقسیم کئے۔
پراجیکٹ کے فوکل پرسن نعمت اللہ ساوند نے کہا کہ سندھ میں سیلاب سے متاثرہ کمیونٹیز کے لیے مربوط ایمرجنسی، صحت، تحفظ، اور واش ریسپانس سندھ رورل سپورٹ آرگنائزیشن، جرمن فیڈرل فارن آفس،مالٹیزر انٹرنیشنل پر مشتمل ایک اشتراکی منصوبہ ہے جس کے تحت یہ سندھ میں سیلاب سے متاثرہ کمیونٹیز کو درپیش چیلنجوں کو حل کرنے میں مدد فراہم کرتا ہے۔ ان اقدامات سے ثابت ہے کہ سیلاب کے بعد متاثرہ کمیونٹیز کو فوری امداد کی زیادہ ضرورت ہوتی ہے، انہیں ہنگامی صحت کی خدمات، کمزور آبادی کے تحفظ، صاف پانی، صفائی اور حفظان صحت کی سہولیات تک رسائی کی ضرورت ہے جو کہ سیلاب سے پیدا ہونے والے پیچیدہ چیلنجوں سے نمٹنے کے لیے وسائل اور مہارت کو یکجا کرتا ہے۔ یہ پراجیکٹ ڈیزاسٹر مینجمنٹ کے لیے ایک فعال اور آگے کی سوچ کا حامل ہے جس میں متاثرہ کمیونٹیز کی فلاح و بہبود اور حفاظت کو سب سے آگے رکھا گیا ہے۔ سیلاب سے متاثرہ علاقوں میں کمزور آبادیوں بالخصوص بچوں کی حفاظت کے لیے سرسو کی لگن اس جامع تربیتی پروگرام کے ذریعے ظاہر ہوتی ہے، سرکاری اساتذہ کو بااختیار بنا کران کے تحفظ کا ایک ایسا اثر پیدا کرتا ہے جو تعلیم سے بالاتر ہو کر پوری کمیونٹی پر مثبت اثر ڈالتا ہے۔
