اسلام آباد،22نومبر (اے پی پی):نگران وزیراعظم انوار الحق کاکڑنے متعلقہ حکام کو بلوچستان میں ٹیوب ویلوں کی شمسی توانائی پر منتقلی کے عمل کو تیز کرنے اور زمیندار ایکشن کمیٹی کے مسائل کا منصفانہ حل نکالنے کی ہدایت کی ہے۔
نگران وزیراعظم انوار الحق کاکڑ سے کاظم اچکزئی کی سربراہی میں بلوچستان کی زمیندار ایکشن کمیٹی کے 15 رکنی وفد نے ملاقات کی۔وفدنے وزیراعظم کو بلوچستان میں زرعی شعبے کے مسائل کے حوالے سے آگاہ کیا ۔ وفد نے وزیراعظم کو بلوچستان میں ٹیوب ویلوں کے بجلی کے بلوں کے مسائل کے حوالے سے آگاہ کیا۔
وزیراعظم نے متعلقہ حکام کو بلوچستان میں ٹیوب ویلوں کی شمسی توانائی پر منتقلی کے عمل کو تیز کرنے کی ہدایت کی۔وزیراعظم نے سیکرٹری توانائی اور چیف سیکرٹری بلوچستان کو زمیندار ایکشن کمیٹی کے وفد سے مل کر ان کے مسائل کا منصفانہ حل نکالنے کی بھی ہدایت کی۔
ملاقات میں سینیٹر مولانا عبد الغفور حیدری اور خالد لانگو بھی موجود تھے۔
