دبئی،02 دسمبر(اے پی پی):نگران وزیراعظم انوار الحق کاکڑ اور شام کے وزیراعظم حسین آرنوس نے ہفتہ کو یہاں کوپ 28 کی سائیڈ لائنز پر ملاقات کی ہے۔ ملاقات میں دونوں رہنماؤں نے دو طرفہ تعلقات کا جائزہ لیا اور دونوں ممالک کی قیادت اور عوام کے درمیان تعلقات کو مزید فروغ دینے کے لیے دو طرفہ سیاسی تبادلوں کی تعدد کو بڑھانے پر اتفاق کیا۔
دونوں رہنماؤں نے اقتصادی، ثقافتی اور سیاحت سمیت مختلف شعبوں میں تعاون کو مضبوط بنانے کے عزم کا اظہار کیا۔ انہوں نے مشترکہ وزارتی کمیشن کو بحال کرنے پر بھی اتفاق کیا۔
وزیر اعظم کاکڑ اور وزیر اعظم ارنوس نے فلسطینی عوام کے خلاف جاری اسرائیلی تشدد پر بھی تبادلہ خیال کیا اور عالمی برادری سے صورتحال کا بامعنی نوٹس لینے کا مطالبہ کیا۔ دونوں رہنمائوں نے طاقت کے وحشیانہ استعمال کو روکنے کے لیے اسرائیل پر دباؤ بڑھانے، جنگ بندی کو یقینی بنانے ، انسانی امداد کی سہولت فراہم کرنے اور مسئلہ فلسطین کو اقوام متحدہ کی سلامتی کونسل کی قراردادوں کے مطابق حل کرنے کی ضرورت پر زور دیا۔
