لاہور، 10دسمبر(اے پی پی):صوبہ پنجاب میں 10 سال بعد 1112 نہروں کی بھل صفائی کا فیصلہ کیا گیا ہے ، بھل صفائی 26دسمبر سے شروع ہو گی اور 20جنوری تک جاری رہے گی۔
وزیراعلیٰ پنجاب محسن نقوی کی زیر صدارت اجلاس میں بھل صفائی کے پروگرام اور پانی چوری کی روک تھام کے لئے اقدامات کا جائزہ لیا گیا۔اجلاس میں تمام ڈویژنل کمشنرز کو نہروں کی بھل صفائی کی مانیٹرنگ کا ٹاسک سونپ دیا گیا۔وزیراعلی پنجاب نے کہا کہ بھل صفائی کے دوران کمشنرز فیلڈ میں رہیں گے اور تمام امور کی نگرانی کریں گے، بھل صفائی کے ساتھ نہروں کی مرمت پر بھی توجہ دی جائے۔
وزیراعلی محسن نقوی نے نہری پانی کی چوری کے سدباب کے لئے موثر کارروائی کا حکم دیا۔انھوں نے کہا کہ انتظامی افسران پانی چوری کے سدباب کے لئے اپنے متعلقہ اضلاع میں موثرایکشن لیں۔
ایڈیشنل چیف سیکرٹری،چیئرمین پلاننگ اینڈ ڈویلپمنٹ بورڈ، سیکرٹریز، زراعت، آبپاشی، خوراک، اطلاعات، کمشنر لاہور اور محکمہ زراعت کے متعلقہ افسران نے اجلاس میں شرکت کی۔صوبائی وزیر زراعت ایس ایم تنویر اورتمام ڈویژنل کمشنرز ویڈیو لنک کے ذریعے اجلاس میں شریک ہوئے۔
