لاہور،13 دسمبر (اے پی پی): گورنر پنجاب محمد بلیغ الرحمان سے گورنر ہاﺅس لاہور میں متحدہ عرب امارات میں منعقد ہونے والی 25ویں ایشین یوتھ چیس چیمپین شپ میں شرکت کرنے والی چیس ٹیم نے خصوصی ملاقات کی۔گورنر پنجاب نے تمام کھلاڑیوں کو چیمپئن شپ میں بہترین کارکردگی دکھانے کیلئے حوصلہ افزائی کی اور نیک خواہشات کا اظہار کیا۔
اس موقع پر گفتگو کرتے ہوئے گورنر پنجاب محمد بلیغ الرحمان نے کہا کہ شطرنج جیسی مائنڈ سپورٹس دور حاضر کی اہم ترین ضرورت ہیں۔ ان گیمز سے بچوں کی ذہنی، جسمانی نشوونما ہوتی ہے۔انہوں نے کہا کہ شطرنج میں ہمارے پاس کافی ٹیلنٹ موجود ہے جس کی مثال بارہ سالہ آیت آصمی ہیں۔انہوں نے کہا کہ آیت آصمی نے رواں سال قازقستان میں منعقدہ ورلڈ چیس سکولز چیمپین شپ میں برونز میڈل جیت کر ملک کا نام روشن کیا اور ایک نئی تاریخ رقم کی۔گورنر پنجاب نے اس امید کا اظہار کیا کہ یہ بچے اپنی صلاحیتوں سے پاکستان کا نام شطرنج کی دنیا میں روشن کریں گے۔
اس موقع پر صدر چیس فیڈریشن آف پاکستان حنیف قریشی نے گورنر پنجاب کا چیس ٹیم سے ملنے اور انہیں دعاﺅں اور نیک تمناﺅں سے رخصت کرنے پرشکریہ ادا کیا۔چیس کے تمام کھلاڑیوں نے ایونٹ میں بہترین کارکردگی دینے کے عزم کا اظہار کیا۔
ملاقات کرنے والوں میں نیشنل چیس چیمپئن و فیڈے (انٹرنیشنل چیس فیڈریشن)ماسٹر نیشنل و انٹر نیشنل چیس ٹرینر عامر کریم، خالد جاوید، پنجاب مائنڈ سپورٹس اکیڈمی، سینئر وائس پریزیڈنٹ محمد سلیم اختر، جوائنٹ سیکریٹری کاشف سلیم، ایگزیکٹیو ممبر سدرہ بٹ، اور ڈویلپمنٹ آفیسر محمد وقار، چیس فیڈریشن آف پاکستان، چیس کے کھلاڑی مئشا فرقان چوہدری، آیت آصمی، حفصہ قمر، عیسیٰ حسین لعل ، عمرو افتخار ، سحان احسن ولید احمد اجلال عامر موجود تھے۔
