اسلام آباد،15دسمبر(اے پی پی):ملک کے بیشتر میدانی علاقوں میں موسم سرد اور خشک جبکہ مغربی علاقوں میں مطلع جزوی ابرآلود رہے گا، تاہم شمال مغربی بلوچستان، بالائی خیبر پختونخوا اور گلگت بلتستان میں مطلع ابرآلود رہنے کے علاوہ ہلکی بارش اور بلند پہاڑوں پر ہلکی برفباری کاامکان ہے، پنجاب کے میدانی علاقوں میں شدید دھند / سموگ چھائے رہنے کا امکان ہے۔
محکمہ موسمیات کے مطابق ہفتہ کے روز ملک کے بیشتر میدانی علاقوں میں موسم سرد اور خشک جبکہ بالائی علاقوں میں مطلع ابر آلودرہے گا تاہم بالائی خیبر پختونخوا، گلگت بلتستان اور کشمیر میں بارش اور پہاڑوں پر برفباری کا امکان ہے۔ اس دوران خطہ پوٹھوہار اور شمال مشرقی پنجاب میں بھی بوندا باندی کی توقع ہے، پنجاب کے وسطی/جنوبی علاقوں اور بالائی سندھ میں صبح اور رات کے اوقات میں دھند/سموگ چھائے رہنے کا امکان ہے۔
گزشتہ چوبیس گھنٹوں کے دوران ملک کےبیشتر علاقوں میں موسم سرد اور خشک جبکہ شمالی علاقوں میں شدید سرد رہا تاہم مغربی بلوچستان میں مطلع ابرآلود رہنے کے علاوہ چند مقا مات پر بارش ہوئی۔ بلوچستان میں نوکنڈی میں 01 ملی میٹر بارش ریکارڈ کی گئی۔
آج ریکارڈ کیے گئے کم سے کم درجہ حرارت کے مطابق لہہ میں منفی 11،اسکردو منفی 08،کالام، گلگت منفی 05، گوپس،سری نگرمنفی 04،ہنزہ،دیر اور استور میں منفی 03 ڈگری سینٹی گریڈ ریکارڈ کیا گیا۔
