لاہور، 18 دسمبر( اے پی پی ): نگران صوبائی وزیر صحت پروفیسر ڈاکٹر جاوید اکرم نے فاطمہ جناح انسٹی ٹیوٹ آف مدر اینڈ چائلڈ میں پاکستان کی پہلی آرٹیفشل انٹیلی جنس گائنی پورٹل کا افتتاح کر دیا۔
اس موقع پر وائس چانسلر فاطمہ جناح میڈیکل یونیورسٹی پروفیسر ڈاکٹر خالد مسعود گوندل، پرو وائس چانسلر پروفیسر ڈاکٹر کامران خالد خواجہ، پروفیسر ڈاکٹر بلقیس شبیر، پرنسپل پروفیسر ڈاکٹر نورین اکمل، ایم ایس گنگارام ہسپتال ڈاکٹر سہیل ارشد رانا، پروفیسر ڈاکٹر عائشہ ملک، عبد الصمد اور طالبات کی کثیر تعداد نے شرکت کی۔نگران صوبائی وزیر صحت پروفیسر ڈاکٹر جاوید اکرم نے آگاہی ورکشاپ میں بھی بطور مہمان خصوصی شرکت کی۔اس موقع پر ڈاکٹر وردہ اشرف نے بھی لیکچر دیا۔
نگران صوبائی وزیر صحت پروفیسر ڈاکٹر جاوید اکرم نے فاطمہ جناح میڈیکل یونیورسٹی، فاطمہ جناح انسٹی ٹیوٹ آف مدر اینڈ چائلڈ اور گنگارام ہسپتال کو پیپر فری کرنے کا بھی اعلان کردیا۔
نگران صوبائی وزیر صحت پروفیسر ڈاکٹر جاوید اکرم نے تقریب اور لیکچر کے شرکاء سے خطاب کرتے ہوئے کہا کہ آج محکمہ صحت کیلئے ایک تاریخی دن ہے پاکستان کی پہلی آرٹیفشل انٹیلی جنس گائناکولوجی پورٹل کا آغاز کیا جا رہا ہے،یہ پورٹل گائنی کے مریضوں کے علاج میں بہت سود مند ثابت ہوگی۔ ریڈیالوجی کے شعبہ میں آرٹیفشل انٹیلی جنس کا بہت اہم کردار ہوتا ہے۔
انہوں نے کہا کہ ایک وقت آئے گا جب ایک ڈاکٹر آرٹیفیشل انٹیلی جنس کے بغیر ادھورا رہ جائے گا۔ فاطمہ جناح انسٹی ٹیوٹ آف مدر اینڈ چائلڈ میں لیول فور کا دو سالہ پروگرام شروع کرنے جا رہے ہیں۔ فاطمہ جناح میڈیکل یونیورسٹی میں ہیلتھ انفارمیٹکس کا ڈیپارٹمنٹ بنایا جا رہا ہے۔
پروفیسر ڈاکٹر جاوید اکرم نے کہا کہ ہیلتھ انفارمیٹکس ڈیپارٹمنٹ کیلئے پنجاب انفارمیشن ٹیکنالوجی بورڈ سے فیکلٹی کی خدمات حاصل کی جائیں گی۔ خدمت انسانیت سے آپ کی موجودہ اور اگلی نسلیں بھی بخشی جاتی ہیں۔ ہسپتالوں میں ہر آنے والے باپ کو اپنا باپ اور ماں کو اپنی ماں سمجھتے ہیں۔
نگران صوبائی وزیر صحت پروفیسر ڈاکٹر جاوید اکرم نے لیکچر کے دوران ڈاکٹر وردہ اشرف اور فیکلٹی ممبران کو بھی یادگاری شیلڈز یش کیں۔
