لاہور،26دسمبر (اے پی پی):لاہور رنگ روڈ سدرن لوپ تھری پروجیکٹ کا مجموعی طور پر60 فیصد کام مکمل کر لیا گیا ہے اور لاہور رنگ روڈ سدرن لوپ تھری 31 جنوری تک ٹریفک کے لئے کھول دیا جائے گا۔
وزیر اعلی پنجاب محسن نقوی منصوبے پر کام کی رفتار کا جائزہ لینے کیلئے اڈہ پلاٹ رائیونڈ پہنچے اور لاہور رنگ روڈ سدرن لوپ تھری پراجیکٹ کا تفصیلی دورہ کیا۔وزیر اعلی نے اڈہ پلاٹ رائیونڈ سے مراکہ ملتان روڈ تک 8 کلو میٹر طویل پروجیکٹ پر جاری تعمیراتی سرگرمیوں کا معائنہ کیا اور پورے روٹ پرجاری کاموں اور زیر تعمیر پلوں پرجاری کاموں کا مشاہدہ کیا۔انہوں نے پروجیکٹ کی جلد تکمیل کیلئے ہدایات دیں۔وزیر اعلی نے پتھر ڈالنے کے کام کا جائزہ لیا۔ایف ڈبلیو اوکے کرنل جمال اور کرنل احمد نے وزیراعلی محسن نقوی کو پراجیکٹ پر ہونے والی پیشرفت کے بارے میں آگاہ کیا۔
محسن نقوی کی زیرصدارت ایف ڈبلیو او کے کیمپ آفس میں منعقدہ اجلاس میں منصوبے کے امور سے متعلق آگاہ کیا گیا۔وزیراعلی نے کہا کہ رنگ روڈ سدرن لوپ تھری کی تکمیل سے عوام کو آمد و رفت کی بہترین سہولتیں ملیں گی۔لاہور رنگ روڈ سدرن لوپ تھری پراجیکٹ 31جنوری تک مکمل ہوجائے گا۔ منصوبے کو اعلی معیار کے ساتھ آگے بڑھایا جارہا ہے۔
انہوں نے لاہور رنگ روڈ سدرن لوپ تھری پروجیکٹ کے دورے کے بعد میڈیا سے گفتگوکرتے ہوئے کہا کہ ایس ایل تھری،گوجرانوالہ ایکسپریس وے اور بند روڈ پراجیکٹس بہت اہمیت کے حامل ہیں۔دن رات کی محنت اور معیار کو برقراررکھتے ہوئے پروجیکٹس مکمل کریں گے۔ایس ایل تھری پروجیکٹ17 ارب روپے سے زائد کا ہے،8 کلومیٹر طویل اور تین تین لینز پر مشتمل ہیں۔ایس ایل تھری پروجیکٹ22 اگست کو شروع کیا، 31جنوری تک ٹریفک کے لئے کھول دیا جائے گا۔انہوں نے کہا کہ ایس ایل تھری اور دیگر پروجیکٹس میں حائل رکاوٹیں ختم کررہے ہیں۔دھند کی وجہ سے پروجیکٹ پر کام رکتا ہے لیکن ایف ڈبلیو او کی ٹیم بہت اچھا کام کررہی ہے۔
وزیراعلی نے کہا کہ ایس ایل تھری اور دیگرپروجیکٹس بڑا ٹاسک ہیں،تمام متعلقہ افراد پروجیکٹس کی لگا تار مانیٹرنگ کررہے ہیں۔پروجیکٹس کی مانیٹرنگ کیلئے صوبائی وزرا اور سیکرٹریز کو ڈیوٹیاں تفویض کی ہیں۔انہوں نے کہا کہ گزشتہ رات اڑھائی بجے صوبائی وزیر منصور قادر سروسز ہسپتال جبکہ صوبائی وزیر بلال افضل رنگ روڈ کی مانیٹرنگ کررہے تھے۔پروجیکٹس مکمل کرنے والی ٹیمز کو ہماری مکمل سپورٹ حاصل ہے۔
صوبائی وزرا، اظفر علی ناصر، بلال افضل، چیف سیکرٹری،سیکرٹری تعمیرات و مواصلات، سیکرٹری اطلاعات، کمشنر لاہور،ڈپٹی کمشنر لاہور، چیئرمین لاہور رنگ روڈ اتھارٹی، ایف ڈبلیو او کے حکام اور دیگرافسران بھی اس موقع پر موجود تھے۔
