لاہور، 28دسمبر(اے پی پی): وزیراعلیٰ پنجاب محسن نقوی نے میو ہسپتال کے تعمیراتی کاموں کا جائزہ لیا اور میو ہسپتال کے ایمرجنسی بلاک کی اپ گریڈیشن کا معائنہ کیا۔وزیر اعلی محسن نقوی نے کہا کہ جنوری کے آغاز میں ایمرجنسی بلاک کو اپ گریڈیشن کے بعد کھول دیا جائے گا۔
وزیر اعلی محسن نقوی نے تعمیراتی کاموں میں اعلی معیار کی تعریف کی، مریضوں اور تیمارداروں کی سہولت کیلئے مناسب سائن بورڈز لگانے کی ہدایت کی۔وزیراعلی نے ہدایت کی کہ ایمرجنسی بلاک کا 100 فیصد کام جنوری کے آغاز میں مکمل کیا جائے۔ وزیر اعلی محسن نقوی نے انفراسٹرکچر ڈویلپمنٹ اتھارٹی اور محکمہ تعمیرات ومواصلات کی کارکردگی کو بھی سراہا۔
سیکرٹری تعمیرات و مواصلات نے اپ گریڈیشن پراجیکٹ پر پیشرفت کے بارے میں وزیراعلی کو بریفنگ دی ۔ پرنسپل کنگ ایڈورڈ میڈیکل یونیورسٹی ڈاکٹر محمود ایاز بھی اس موقع پر موجود تھے۔
