لاہوریکم جنوری:( اے پی پی ) وزیر اعلیٰ پنجاب محسن نقوی نے نئے سال 2024ء کا آغاز بھی عوامی خدمت سے کیا اور فلاح عامہ کے منصوبوں کے دورے کیے۔ وزیراعلی پنجاب محسن نقوی نے رات گئے کنٹرولڈ ایکسس کوریڈور بند روڈ پراجیکٹ کا تفصیلی دورہ کیا اور 2 گھنٹے تک3 7.کلومیٹر طویل پورے پراجیکٹ پر پیشرفت کا جائزہ لیا۔ پیکیج ون کا 50 فیصد اور پیکیج 2 کا 38 فیصد کام مکمل ہو گیا۔ وزیر اعلی محسن نقوی نے 31 جنوری تک پراجیکٹ مکمل کرنے کی ڈیڈ لائن دے دی۔ وزیر اعلیٰ محسن نقوی نے کہا کہ اس میگاپراجیکٹ میں ایک دن کی بھی تاخیر نہیں ہونی چاہیے اور منصوبے کو وقت سے قبل پایہ تکمیل تک پہنچانے کے لئے دن رات کام کیا جائے۔ وزیر اعلی محسن نقوی نے پراجیکٹ کے لیے مٹی سپلائی کرنے والے کنٹریکٹر سے بھتے لینے کی شکایت کا سخت نوٹس لیتے ہوئے بھتہ مافیا کے خلاف بلاامتیاز قانونی کارروائی کا حکم دیا۔ وزیر اعلی محسن نقوی نے موقع پر ہی پولیس کو احکامات جاری کئے۔ وزیر اعلی محسن نقوی نے بابو صابو سے سگیاں تک پیکیج 2 اورسگیاں سے نیازی چوک تک پیکیج ون کا معائنہ کیا اور منصوبے پر جاری تعمیراتی سرگرمیوں کا جائزہ لیا۔ وزیر اعلی محسن نقوی نے منصوبے کی اطراف والی دیواروں کی تعمیر کے کام کا مشاہدہ کیا اور سائیڈ والز پر پتھر کے چوکھٹے رکھنے کے عمل کا جائزہ لیا۔ وزیر اعلی محسن نقوی نے دونوں کنٹریکٹرز کو کام کی رفتار تیز کرنے کی ہدایت کی۔وزیر اعلیٰ محسن نقوی نے منصوبے کی اطراف سٹرکوں پر تجاوزات مسمار کرنے کا حکم دیتے ہوئے ڈپٹی کمشنر لاہور کو ٹاسک دے دیا۔ کمشنر لاہورڈویژن و ڈی جی ایل ڈی اے محمد علی رندھاوا نے وزیر اعلی محسن نقوی کو پراجیکٹ پر ہونے والی پیشرفت کے بارے میں بریفنگ دی۔صوبائی وزراء منصور قادر،عامر میر، اظفر علی ناصر،سی سی پی او، سیکرٹری تعمیرات و مواصلات،ڈپٹی کمشنر اور متعلقہ حکام بھی اس موقع پرموجود تھے۔
