اسلام آباد۔3جنوری (اے پی پی):خصوصی سرمایہ کاری سہولت کونسل ( ایس آئی ایف سی ) نے سعودی عرب ، قطر ، متحدہ عرب امارات اور کویت کے ساتھ مفاہمتی یادداشتوں کو تیز رفتاری سے معاشی حقیقت میں تبدیل کرنے کی ہدایات دی ہیں، کمیٹی نے ڈومیسٹک ڈسپیوٹ ریزولیوشن کے طریقہ کار کو مضبوط بنانے سمیت سرمایہ کاروں کو مزید سہولت فراہم کرنے کے لئے مختلف پالیسی سازی کی منظوری دی ، کمیٹی نے سرمایہ کاروں کو خاص طور پر ملک کے دور دراز علاقوں میں سہولت فراہم کرنے کے لئے انفراسٹرکچر کی ترقی کو تیز کرنے پر بھی اتفاق کیا ہے، کمیٹی نے سمگلروں اور ذخیرہ اندوزوں کے خلاف کارروائی جاری رکھنے کے پختہ عزم کا بھی اظہار کیا ہے۔بدھ کو وزیراعظم آفس کے میڈیا ونگ سے جاری بیان کے مطابق خصوصی سرمایہ کاری کی سہولت کونسل کی ایپکس کمیٹی کا 8واں اجلاس منعقد ہوا۔
نگران وزیراعظم انوار الحق کاکڑ کی زیرصدارت اجلاس میں چیف آف آرمی سٹاف، وفاقی کابینہ، صوبائی وزرائے اعلیٰ اور اعلیٰ سطح کے سرکاری حکام نے شرکت کی۔ مختلف وفاقی وزارتوں نے کلیدی شعبوں میں منصوبوں پر پیش رفت اور متوقع سرمایہ کاری کی بروقت تکمیل کے حوالے سے اجلاس کو آگاہ کیا۔
کمیٹی نے ایس آئی ایف سی کے تحت مختلف شعبوں میں حاصل ہونے والی مجموعی پیش رفت پر اطمینان کا اظہار کیا۔ کمیٹی نے سعودی عرب اور قطر کے ساتھ دوطرفہ سرمایہ کاری کے معاہدے کو حتمی شکل دینے کے ساتھ ساتھ متحدہ عرب امارات اور کویت کے ساتھ مفاہمت کی یادداشتوں اور فریم ورک معاہدوں پر دستخط سمیت دوست ممالک کے ساتھ معاشی روابط میں اضافہ کو سراہا۔ فورم نے ان مفاہمتی یادداشتوں کو تیز رفتاری سے معاشی حقیقت میں تبدیل کرنے کی ہدایات دیں۔ کمیٹی نے نجکاری پر پیشرفت کا بھی جائزہ لیا اور مختلف اہم اہداف کی بروقت تکمیل میں مختلف سٹیک ہولڈرز کے باہمی تعاون کو سراہا اور رفتار کو برقرار رکھنے کے لئے ہدایات دیں۔
کمیٹی نے سرمایہ کاری کے ماحول کو بہتر بنانے کے لئے کئے جانے والے مختلف اقدامات پر پیشرفت کا جائزہ لیا اور ڈومیسٹک ڈسپیوٹ ریزولیوشن کے طریقہ کار کو مضبوط بنانے سمیت سرمایہ کاروں کو مزید سہولت فراہم کرنے کے لئے مختلف پالیسی سازی کی منظوری دی۔ کمیٹی نے سرمایہ کاروں کو خاص طور پر ملک کے دور دراز علاقوں میں سہولت فراہم کرنے کے لئے انفراسٹرکچر کی ترقی کو تیز کرنے پر بھی اتفاق رائے کیا۔
کمیٹی نے معیشت کے اہم شعبوں میں ابھرتی ہوئی ضروریات کو پورا کرنے کے لئے انسانی وسائل کی ترقی کے لئے جاری شمولیتی نقطہ نظر کو سراہا۔ کمیٹی نے سمگلروں اور ذخیرہ اندوزوں کے خلاف کارروائی جاری رکھنے کے پختہ عزم کا اظہار کیا۔
آرمی چیف نے ملک کی معاشی بحالی کے لئے حکومتی اقدامات کی حمایت کے لئے پاک فوج کے غیر متزلزل عزم کی یقین دہانی کرائی۔ آخر میں وزیر اعظم نے تمام سٹیک ہولڈرز کو ہدایت کی کہ وہ ایس آئی ایف سی کے مختلف اقدامات کو بھرپور طریقے سے آگے بڑھائیں تاکہ مقررہ مدت کے اندر ان کی تکمیل کو یقینی بنایا جا سکے۔
