اسلام آباد،09 جنوری(اے پی پی ): نگران وفاقی وزیر تجارت وصنعت اور سرمایہ کاری ڈاکٹر گوہر اعجاز نے کہا ہے کہ پاکستان معاشی طور پر ٹیک آف کرنے کیلئے تیار ہے اور ہمارا مشن پاکستان کی معیشت کو ایک ہزار ارب ڈالرز تک پہنچانا ہے۔
مصر کے شہر قاہرہ میں پاکستان افریقہ ٹریڈ کانفرنس سے خطاب کرتے ہوئے نگران وفاقی وزیر کا کہنا تھا کہ پاکستان،مصر اور شمالی افریقہ کے ممالک کے ساتھ باہمی تجارت بڑھانے کیلئے اقدامات کر رہا ہے اور پاکستان کی برآمدات کو 100 ارب ڈالرز کرنے کا پلان ہے۔
وزیر تجارت کاکہنا تھا کہ پاکستان زراعت اور لائیو سٹاک کے شعبے پر خصوصی توجہ مرکوز کر رہا ہے اور لاکھوں ایکڑ رقبہ کارپوریٹ فارمنگ کیلئے مختص کیا جا رہا ہے ۔ اس کے علاوہ گندم ،سویا بین، تل سمیت دیگر کئی زرعی اجناس کی پیداوار بڑھانے کے لیے بھی اقدامات اور گوشت کی برآمدات کو بڑھانے کیلئے سلاٹر ہاوس بھی قائم کیے جا رہے ہیں۔
گوہر اعجاز نے کہا کہ پاکستان جی سی سی ممالک اور چین کے ساتھ آزادانہ تجارت کا معاہدہ کر رہا ہے اور ملک میں سرمایہ کاری کا بہترین مواقع موجود ہیں۔انہوں نے کہا کہ مسلم ممالک مل کر معاشی طاقت بن سکتے ہیں۔
نگران وفاقی وزیر تجارت وصنعت اور سرمایہ کاری ڈاکٹر گوہر اعجاز نے کہا کہ پاکستان اور مصر ایک جیسی مصنوعات تیار کر رہے ہیں اور مصری سرمایہ کار پاکستان کو اپنی مصنوعات برآمد کر سکتے ہیں۔
