لاہور،12 جنوری ( اے پی پی): پنجاب سیف سٹیز اتھارٹی میں نیشنل پولیس اکیڈمی کے زیر تربیت اے ایس پیز( ASPs ) کی 2 روزہ تربیت مکمل،50 ویں کامن کے30 اے ایس پیز کو سیف سٹی میں جدید پولیسنگ بارے تربیت دی گئی، پولیس افسران کو ڈیجیٹل فورانزک ایویڈنس کی قانونی اہمیت اور تفتیش کے عمل بارے تربیت دی گئی ۔افسران کو ایل ٹی ای ایڈوانس ہینڈسیٹس اور جیوگرافک انفارمیشن سسٹم بارے تربیت دی گئی۔
اے ایس پیز نے 15ایمرجنسی کالزاور ان پر پولیس رسپانس کا عمل دیکھا اور ریڈیو سیف سٹی اور ویب ٹی وی لائیو پروگرامز میں بھی شرکت کی۔
چیف آپریٹنگ آفیسر پنجاب سیف سٹیز اتھارٹی مستنصر فیروز نے اس موقع پر گفتگو کرتے ہوئے کہا کہ نوجوان افسران ٹیکنالوجی کو بہترانداز میں سمجھتے ہیں جسکا فورس کو فائدہ ہوگا،جرائم کی بیخ کنی اور مظلوم کا سہارا بننے کیلئے سروس کو عبادت سمجھنا ہوگا، روایتی پولیسنگ کا دور ختم، دنیا بھر میں ماڈرن ٹیکنالوجی سے مدد لی جارہی ہے۔ انہوں نے کہا کہ اتھارٹی کا تربیتی کورس جدید طریقہ تفتیش اورجرائم کی سرکوبی میں مددگار ہوگا۔
