لاہور۔ 15جنوری۔( اے پی پی ) نگران صوبائی وزیر صحت پروفیسر ڈاکٹر جاوید اکرم نے کہا ہے کہ کسی بھی ملک کی ترقی وہاں کے امن کے ساتھ جڑی ہوتی ہے۔ کسی بھی ملک کی ترقی بد امنی کے ساتھ ناممکن ہے۔ آج کی دنیا میں نوجوانوں کو ملکی ترقی کیلئے اپنا کردار ادا کرنا چاہئے۔ امن پاکستان کے ہر شہری کا بنیادی حق ہےسرمایہ کاری کیلئے قیام امن بنیادی جزو ہے۔ان خیالات کا اظہار انہوں نے مقامی ہوٹل میں اے ایس فاؤنڈیشن کے زیر اہتمام پیس اینڈ اکنامکس سمٹ میں خطاب کرتے ہوئے کیا۔اس موقع پر فہیم الرحمن سہگل، محمد علی میاں، ایڈیشنل آئی جی ریاض نذیر گارا، محمد ندیم بھٹی، محمد ابوبکر، احسن یار بابر، بلال خان اور خواتین و حضرات کی کثیر تعداد نے شرکت کی۔نگران صوبائی وزیر صحت پروفیسر ڈاکٹر جاوید اکرم نے کہا کہ انتہائی اہم موضوع پر سمٹ کے انعقاد پر انتظامیہ کو مبارکباد دیتا ہوں۔نگران حکومت پنجاب صاف، شفاف اور پر امن انتخابات کے انعقاد کی ذمہ دار ہے۔ سمٹ کے آخر میں نگران صوبائی وزیر صحت پروفیسر ڈاکٹر جاوید اکرم نے مہمانوں کے درمیان ایوارڈز بھی تقسیم کئے۔
