لاہور،16 جنوری (اے پی پی ): نگران صوبائی وزیرصحت پروفیسرڈاکٹرجاویداکرم نے کہا ہے کہ وزیراعلیٰ پنجاب سیدمحسن نقوی کے ویژن کے مطابق سرکاری ہسپتالوں کی ری ویمپنگ کی جارہی ہے۔چلڈرن ہسپتال لاہورمیں ایچ آئی ایم ایس سسٹم کے تحت مریضوں کا ڈیٹااکٹھا کیاجارہاہے۔
ان خیالات کا اظہار انہوں نے یونیورسٹی آف چائلڈہیلتھ سائنسزمیں صوبہ بھرمیں بچوں میں نمونیہ کے کیسزمیں اضافہ کے حوالہ سے ایک اہم پریس کانفرنس سے خطا ب میں کیا۔ انہوں نے اس سے قبل چلڈرن ہسپتال لاہورمیں جاری ری ویمپنگ پر جاری پیشرفت کا بھی تفصیلی جائزہ لیا۔ بچوں میں نمونیا کے حوالے سے پروفیسر جنید رشید نے تفصیلی بریفنگ دی اور تمام ماہرین نے اپنی رائے کا اظہار کیا۔ نمونیا کے حوالے سے میڈیا کے ذریعے عوام کو نمونیا کے حوالے سے آگاہی دی گئی۔
نگران صوبائی وزیرصحت نے اس موقع پر کہا کہ خناق کے بارے میں عالمی ادارہ صحت (ڈبلیو ایچ او) کی تازہ ترین ایڈوائزری پر بھی بات ہوئی ہے۔ نمونیا کی یہ لہر ہر سال سردی میں آتی ہے اور بالخصوص 5 سال سے کم عمر بچوں کو متاثر کرتی ہے۔ ایک سال سے کم عمر کے بچے سب سے زیادہ اس بیماری سے متاثر ہوتے ہیں۔ نیشنل انسٹی ٹیوٹ آف ہیلتھ نے نمونیہ اور کالی کھانسی بارے گائیڈلائینز جاری کررکھی ہیں۔ انہوں نے کہا کہ حکومت پنجاب بالخصوص وزیر اعلیٰ پنجاب کی ہدایات کے مطابق سو فیصد مفت علاج کو یقینی بنایا گیا اور نمونیا اور خناق سے متعلقہ ہر قسم کی ادویات اور حفاظتی ٹیکہ جات وافر مقدار میں چلڈرن ہسپتال میں موجود ہیں۔ چلڈرن ہسپتال لاہورسمیت پنجاب کے 113سرکاری ہسپتالوں میں ری ویمپنگ کا کام کامیابی سے جاری ہے۔
نگران صوبائی وزیرصحت پروفیسرڈاکٹرجاویداکرم نے کہا کہ وزیراعلیٰ پنجاب سیدمحسن نقوی نے چلڈرن ہسپتال لاہورمیں جاری کام کی پیش رفت کو مسلسل مانیٹرکرنے کی ہدایت کی ہے۔چلڈرن ہسپتال لاہورکے 4لاکھ سکوئرفٹ کو ری ویمپ کیاجارہاہے۔انشاء اللہ چلڈرن ہسپتال لاہورمیں بہت جلدفائیو سٹارطبی سہولیات دستیاب ہوں گی۔اس ہسپتال میں نئے بستربھی آچکے ہیں۔انشاءاللہ 31جنوری تک ایمرجنسی،اینڈروکولونوجی،میڈیکل،کیفے ٹیریا،آئی اور ای این ٹی سمیت 13کے قریب شعبہ جات کو مکمل ری ویمپ کردیاجائے گا۔چلڈرن ہسپتال کے تین فلورکی مکمل طورپر ری ویمپنگ کی جارہی ہے۔
انہوں نے کہا کہ چلڈرن ہسپتال لاہورکے اردگردکوئی میڈیکل سٹورنہیں ہے کیونکہ یہاں آنے والے مریضوں کو ہر قسم کی ادویات مفت فراہم کی جاتی ہیں۔چلڈرن ہسپتال لاہوربچوں کے علاج و معالجہ کے حوالہ سے دنیاکی سب سے بڑی علاج گاہ ہے۔
وائس چانسلر یونیورسٹی آف چائلڈہیلتھ سائنسز پروفیسرڈاکٹرمسعودصادق نے پریس کانفرنس سے خطاب کرتے ہوئے کہاکہ والدین کو بچے کی سانس تیز یا غنودگی کی صورت میں فوری طورپر ہسپتال لے جانا چاہئے۔ ری ویمپنگ کے دوران ایک دن بھی چلڈرن ہسپتال لاہورکی ایمرجنسی کو بندنہیں کیاگیا۔
نگران صوبائی وزیرصحت پروفیسرڈاکٹرجاویداکرم نے صحافیوں کے سوالات کے جوابات دیتے ہوئے کہاکہ جنوری میں بچوں میں نمونئے کے کیسزمیں اضافہ نظرآرہاہے۔ والدین اپنے بچوں کو مکمل ویکسی نیٹڈ رکھیں۔ گھروں میں ایک ہی کمرے میں زیادہ افراد کے سونے سے بھی اجتناب کرناچاہئے۔ صوبہ بھر میں یونیسف کے ہمراہ بریسٹ فیڈنگ کی اہمیت بارے آگاہی پھیلائی جارہی ہے۔صحت سہولت پروگرام کو بند نہیں کیاجارہا بلکہ اس پروگرام میں مزید بہتریاں لائی جا رہی ہیں۔ہم نے نجی ہسپتالوں سے بزنس کو سرکاری ہسپتالوں میں شفٹ کیاہے۔
پریس کانفرنس کے موقع پر محکمہ تعمیرات و مواصلات ( سی اینڈ ڈبلیو) کے نمائندے ثاقب رحیم سپرنٹنڈنگ انجینئر و عاصم شہزاد ایگزیکٹو انجینئر کے علاوہ مختلف معروف معالجین بھی موجود تھے۔
